نبطي

()عليك بنفسك()

أنعامْ ربّك ما حصاها عَدْ

                ولاتنحصي أرزاقْ مِعطيها

ولو عبدْمثلكْ بابْ عنّكْ سَدْ

                  يفتحْ لكْ الأبوابْ مكفيها

وانْ صَدْ عنّكْ يومْ مَنْ هو صَدْ

         نفسِهْ مريضَهْ ادعْ  الله يَشفيها

يومْ امسْ واليوم هذا وْغَدْ

                مَ حدٍ دَرى مَقدورْ ما فيها

لاتهدرْ الأيام ب اخذْ اوْ رَدْ

                  كَم غاديٍ كلْ يومْ غاديها

كل نفسْ لا رِدتْ قولْ الجدْ

                    مرهونةٍ بحسابْ باريها  

ماكَلَّفَكْ رَبّكْ  تِقَيِّم حَدْ

                    الله  وحدِهْ من يجازيها

الخيرْ قدّمْ بالحياة وزِدْ

                 في صفحتِكْ تلقاهْ ماليها

وان رِدتْ وجهكْ يومَها يَسوَدْ

                على هواها نفسكْ اعطيها

امسِكْ اعصابكْ هَدّيها ولاتحتَدْ

            ترى الحَمَق بلى للنّفسْ يَبليها 

لسانك عن السّيّات ضع له حَدْ

                    نفسك ترى بالنّار يرديها

وعشرة لئيم النّفس عنها حِدْ

        واحذرْنْفوسٍ نَخوةْ رَاس مافيها

لان الرّدي لاصارْ وگت الجَدْ

       خشمهْ ذليلْ بْنعلْ الفلسْ تاطيها

بِعهْ بْرُخصْ، طاقاتْ ريحِهْ سِدْ

        واتركْ خْباثٍ ريحةْ خيرْ مافيها

                     فيصل أحمدالحمود