غرباء (باللهجة اللبنانيّة)
غُربا و منشبَه بَعض
غُربا منِسهَر مع بَعض
منعدّ الأيام ال راحِت
و ما بيخلَص معنا العَد
...
منطلَع بعتم الليل
منشوف نجوم و قمر
منفتح على الفايسبوك
و بيطوّل معنا السهَر
...
معقولِه شو بتشبهني
نفس الوجَع نفس الشِعر
نفس الضياع نفس الهوى
نفس الوَهم نفس القَهر
...
هيّه جريحة و مثلها
قلبي عطشان ل قلبها
من غيّر لون الحقيقة
وال قبلها وال بَعدها
...
منرسم صُوَر أحلامنا
منشمّ عطر ورداتنا
منبرم الدنيي بكبسة
بيكثر عدد رفقاتنا
...
وهم بوهم
فسحة حلم
عجز و ظلم
كذب و عِلِم
صفحات ملِت كتابنا
...
برَمت الدني بشاشِه و رقم
و بعدُه عشقي جنون
بعدها غريبه و أنا غريب
ولا بتعرِف مين بكون !
...
نام القمر
طلع الصبح
والشيخ أذّن للصلاة
و غسَلت وجهي منيح
شفت الحقيقة صايرة
قشّة بوجه الريح...!
...
عدنان خليفة