قصيدة /رحت الداخله..شعر/على محمد شحاته
رحت الداخله وشفت بلادى
رحت الداخله عروس الوادى
ايام حلوه ورحله جميله
ذكرى حكيتها لكل اولادى
تلقى الميه هناك درجات
دافيه شويه وسخنه ساعات
باذن المولى هتشفى ابدانا
من امراض وريتنا اهات
موط الهاديه سكونها جميل
رايقه وعايقه نسيمها عليل
امنها زيه ما شفتش عمرى
شفت بعينى وعينى دليل
رحت الراشده وشفت عجايب
بجمال ناسها هتلقى الصاحب
هتشوف خضره ترد الروح
ويا الميه هتبقوا حبايب
اما القصر فله عشاق
غاوى تاريخه وله مشتاق
تحكى حيطانها وكل بيبانها
احداث ليها كتير نشتاق
بكل امانه جميله يا مصر
صح كنوزك ملهاش حصر
يوم ورا يوم بيزيد عشاقك
مهما تغلى علينا المهر
