مش مهم ..

مش مهم .. يعني هي ناقصة هم ..

إيه يعني عرض .. وتاريخ و أرض ...

ايه يعني دم ؟؟!

إحنا شعارنا .. الرز أهم ..........

أبجني تجدني أبيعلك أرض ..

وغاز ونيل وناس وعرض ...

كل شيء عندنا للبيع ..

أدفع .. وانا جاهز بالعقد ..

وماتقلقش من آي حد ..

لا تقولي نخبة .. ولا حتى شعب ...

عاملين سجون .. ورصاص للقلب ..

واللي هيفتح بقه فيهم ..

إحنا نمشيه زي الكلب ..

والإعلام والطبلجية ..

شغالين مية مية ..

غسلوا عقول نص الناس ..

والباقي تحت البندقية ..

شعب شقيناه اتنين ..

نص معانا والباقي مساجين ..

واللي يرفع راسه نقطعها ..

واللي يطبل .. له قرشين ..

مبروك عليكوا الجزيرتين ..

وبير الغاز بيعته لحبايبنا ..

وفضينا سينا من قرايبنا ..

وبكره نأجرها مفروش ..

واللي مش عاجبه يفارقنا 

ولما سد إثيوبيا يخلص ..

والنيل يقل وميته تنقص 

هنبطل نزرع رز وقمح ..

وبكره سعر الرز يرخص ..

مستقبل عامر بالإنجازات ..

إيشي خراب ف معجزات؟!

والله ما مصدق عمايلي ..

خربتها ف تلت سنوات 😂😂

والبركة ف اللي زاطوا 

واللي باع دم اخواته ..

أصل إحنا نخاف مانختشيش ..

واللي اختشوا ..

اتسجنوا .. وماتوا ..

بقلمي/ عادل محمود ...