( سرقو الجثه )
سهل تطبل سهل تهز
بردو العيشه مش ح تلذ
لو مش عجبك
قولها لنفسك
مليون طظ
انا مش بايع نفسى لحد
ولا ح يسوقنى الخوف والسوط
عزة نفسى هى رصيدى
بس شايلها بأمر القوت
مش مضطر ولا بالأمر
غصبن عنى وخايف موت
أصل الفقر دا خبره وعقر
تاخد منه بالشلوت
يلغى كرامتك ويهين شيبتك
ولا ح يراعى أبدا هيبتك
إلحق موت
قبل م تلقى التربه اتزحمت
يطلع ميت يجى يقولك
عدى علينا بكره وفوت
كنت حجزت لنفسك قبر
أصل الجته ملهاش عذر
بكره نبيعها لأهل الطب
يادى النيله يادى الغلب
حتى الجثه جوم سرقوها
وبتتشرح علشان يشرح
فص الكبد ونوع القلب
يللى دفنت حبيبك إلحق
لما تزوره زوره ف صمت
هو أكيد مش قاعد تحت
(نبيل الوردانى)
