قلم معتوه كتب عنك
فى مرة كـــــــــلام
مالهش أساس
من الصحة
حلفت ما يلمس الكراس
ويجى يقبلك ع الراس
ويتأسف عن الإحساس
عشان يكتب فى يوم كلمة
يا أجمل اسم فى الدنيا
بحبك ياللى وحشانى
ولو غاب القمر ثانية
أحس الدنيا عميانى
لا أنا شايف ولا عارف
بقولهاك أنا أسف
ومن يومها وأنا خايف
أعيش فى الهم وحدانى
ولو فكر يتوه تانى
هضيع اسمه وفى لحظة
وهكتبلك يا ستى ديوان ينسيكِ
وكل ما فيه من الألحان يكون ليكِ
وأخلى الحبر من دمى فدا عينيكِ
وأخلى الناس تغنيلك
ما بين اللحظة والتانية
قلم معتوه مالوش لزمة
عمل بينى وبين الحب مية أزمة
خلاص ما عدش يتكرر
أنا طالب بأن أشوف ملاك الكون
بتضحك جوا أحضانى ومبتسمة
يا أجمل اسم فى الدنيا
بحبك صاحبة العصمة
قلم معتوه كتب عنك
فى مرة كـــــــــلام
مالهش أساس
من الصحة
الشاعر / ناصر عبد المقصود
