==========لو فيه كلام .. يا اما كنت اقوله====
^^^^^^^^^^^^^^^^^^^^^^^^^^^^^^^^^^^^^^^^
1-
كل عام يجيى الميعاد
واشوف الدمع يجرى فى سكات
يشدنى حبل الوداد
والعمر اللى تاه وسط العباد
والتقى صوتك يسبق النبض
جوا الفؤاد
واجرى الحق ذكرى
تاهت فى البعاد
مهما مر العمر يا اما
انت ساكنة فى كل همسة
وفى كل دار
جوا كل عيون خضار
شايلة افراح النهار
شايلة حزن الصغار
كل عين بتتولد
شايلة صبر العمر
وقهر الانتظار
كنتى لهم نور
عمار
2-
با أمد فى عمرك اللى انقطع
بكام حدوتة و حكاية
وشوية حروف دلع
ومغموسة بمر الوجع
وافرد سجاجيد الدعا
يمكن اشوف طيفك رجع
يا لحن لسه با عزفه
واسمع تراتيله فى السما
يا غنوة العمر اللى سما
لسه فى ايدينا لحظة دفا
من نهر حبك اللى ما جفا
يا شراع فى بحر الليل
كان بيهدينا للنجوم السارحة
والمينا فى عيونك كات مفرحة
الريح فى بعدك
مذبحة
والجرح ما عاد له أطبة
او دوا
والكون دروبه ضيقة
فى عينيك
كنت اشوف للصبح زقزقة
الضلة كات حضنك
اسند همومى فى حجرها
تتفرفط الاهات
ويتفرفط مرها
كنت افتكر عمرى يوازى عمرها
لكن السنين غدرت بعهدى
وبعهدها
ح نتعاتب فى ليلة شتوية
وترُمى عضم الوجع فيه
يا ساقية بالصبر دوارة
تسقى العطاشا عسل
اه بس لو كان يطول الاجل
وتفرعى
جوا الصبايا امل
آه يا نيل و اتسرق منا
الكل لسه عطاشا
والحب غاب عننا
باافتح بيبان دواليبك
القى السنين مترصصه
تسأل على سنينك
بتطل وتناجى مواويلك
يا شايلة هم الهموم
لسه الامانى غيوم
والموجة واخدانا
يا ضحكة الاوليا
يا كلمة ربانى
غابوا الاحبة كلهم يوم ما غاب
ضلك وجفانى
ح امشى حدا قلبك
اياكى
تقفلى قبرك
او تشفى حرمانى
---------------------------------
=====================محمد عبد المقصود داود =======
