الســـــوق
إحنا ف بلد السوق
وإمتا يا أرض الغلابة نفوق
حمرة يا قوطة وبنحبكِ
وكل ساعة ف حال
مجنونة والجنون طبعكِ
عمره ما دام علي حال
زى ألاعيب السياسية
ما لكيش لاعم
ولا خال
والفقير حاله عدم
مسكين ف كل لاحوال
***********
أخضر يا خيار الحبايب
كلك عسل وجمال
طرح الأراضي مكاسب
ومنين نجيب أكال
وإللي حاله على قده
عامل مع شيال
*************
كوست المحاشي يا كوسة
وإللي ما يعرف يدوقكِ
ميت حوسة عليه
ميت حوسة
نشوفكِ بس ف الـوظايف
والحكومة كوسة ف كوسة
جميلة يا كوسة وعال
***********
أكل الباشوات يا بسلة
يا منورة جوة السلة
غارزين ف ضهورنا سِلة
والفقر ربالنا عِـلة
بلدنا غـنية وإحنا حزانا
وإللى وكلها شلة أندال
************
يا متلج يا عرق سوس
وأخدين يا أخونا على الدوس
ف القسم ناخد لبوس
والجزمة البنص نبوس
والوظيفة مدير متعجرف
وسياسي يا ناس مهـوس
وحزبي متمرس
واكل عمال على بطال
***********
الملوخيا بتعت الأرانب
أكل الدولارت يا أرانب
الأستك راح زمانه
والزمن ده زمن الأرانب
والجنيه بتاع الغلابـة
بقا فرجة لللأجانب
**********
السمك البلطي الطـازة
خد كيلو يملا الطاسة
دا أحسن م الافيون
ويعمر لك الطاسة
يدوخك لو خفيف
عشان ما تشفشي الباشا
*************
بطاطس زي الخشاف
وعاملين م حدش شاف
كُل بطاطس ونام
وإتلف ف ألف لحاف
**********
زي الدم يا فراولة
يامشيلانا الهم مداولة
فيه ناس بتفهم وناس
ما عندهاش دم يا فرولة
وناس بتشرب عصير
ناس ماتعرفش المحاولة
************
أخضر يا فجل وراور
إصحا يا عجل وشاور
هو ده أكلك ياحزين
أخرك فجل وجرجير
ولو نسيت إنك بني أدم
راح تشرب المرعصير
***********
البصل البلدي
والبصل الصعيدي
رضا بلدي علىَ
يبقا يوم عيدي
مش مهم راضنا إحنا
المهم رضا بلادي
*********
الشاعر / رمضان فؤاد أبو الوفا
