سوريا
دق الخطر
والغاره جايه من بعيد
تكتب حكاية كام يتيم
وكام شهيد
شافها الجدع
خاف واتفجع
راح على ابنه الوليد
ضم حضنه علي يصونه
يبعد الموت عن عيونه
بس طبع الموت عنيد
السما بتنزف بارود
والوجع مالهوش حدود
واللى نازل م الوريد
دم حاضن حضن دم
ياوليد ماتشلش هم
انت ويا ابوك شهيد
سوريا يابلد الارامل
يالى بتحاربى بدموعك
فيكى بحر الدم سايل
والوجع شبع ربوعك
فيكى نور الشمس مايل
حادف الضله بعيد
كام رضيع على صدر امه
نام الم من كتر جوعك
كام يتيم دموعه جفت
منتظر لحظة رجوعك
كام رصاصه شقوا قلبك
وانت قلبك من حديد
-----
نصحى ويادوب الطل طل
نسمع ادان الحرب هل
والموت ماعادش بيختشى
زرع الالم فينا ومشى
حتى الالم جوانا مل
احتارت الدمعات وجع
تنعى الوليد والا الجدع
شرب التراب دم وشبع
نكس عيون الارض زل
وطن وضاع منه الوطن
واخد حروف الاه سكن
هرب الكلام خاف يتسجن
شافوا اللسان قرر يضل
شايفين وعارفين الحكايه
واخدين كلام الكدب ايه
قرب خلاص خط النهايه
ومين قدر م الموت يفل
محمد الروبى ابو وديع
