أنا حوا
****
كإنك فاكر إني ملاك
و إنت شيطان جَحود فتاك
و أنت بعيد .. أو وياك
شعور غريب بيملكني
و رغم خوفي بأستناك
بأدور للُقانا على معنى
يا هل ترى حـ يجمعنا
شوقنا دهوا في الجنة
و إلا عذابه حـ يرمينا
في بحر غويط كله هلاك
كأنك فاكر إني ملاك
هما يومين و نظرة عين
تدوب قلب بفرح حنين
و تمسح دمعة عـ الخدين
و بَعده العمر يسرقنا
و أخرتها فراق فتاك
في احلامي و أنا نايمة
أشوف حبك و نبع حنان
لكن برده بأقوم خايفة
لإن الغدر فيك غلاب
و طبع عنيد صَبَح أشواك
كأنك فاكر إني ملاك
مرار .... و عذاب
بأحسه لما أشوف عينك
بتتسحب بدون أسباب
تبوس ضحكة على شفايفي
تزيد خجلي فادوب وياك
بلاش تنسى إن أنا حوا
في كفي نقوش من الحنة
و عيني بحور لهيب قايدة
تأجج نار قلوب دايبة
ما تسمح إلا بصدق هواك
كأنك فاكر إني ملاك
بلاش تتغر في حناني
ما قلت زمان حـ تنساني
بلاش القُرب من تاني
لأخلي عنيك تناجيني
بسهم رمش تقول رُحماك
و خُدها نصيحة مني كمان
لا أنا إنسان في شكل ملاك
و لا أنت كمان في توب الجان
تدس السم في عيوني
فتسحر عقل عاوز يسلاك
كأنك فاكر إني ملاك
ما بأرضى بظلمي و هواني
يومين تعشق و تسلاني
و لو ترجع في يوم نادم
ما اسامحك و .. لو بـمُر بُكاك
فإوعى تنسى إن أنا حوا
و أتمنى أكون نجمة
عزيزة بين نجوم ضيك
و بدر فريد عايش في سماك
سعاد الزامك
