بحبك يا بلدى
للشاعر : أحمد الشبراوى محمد
............................
بحبك يا بلدى
ومن غلبى
بحبك كمان وكمان
لانا طمعان فى منصب
ولا طمعان فى نيشان
الغلب غلبنى
لكن بحبك انا شبعان
..................
بحبك يا بلدى
مع انى فقير
لاجاه ولا مال
لكن
حبك فى قبلى
جبال وتلال
.............
بحبك يا بلدى
وحبك فى قلبى تلال
تلال من ذهب وفضة
لولى ومرجان
.................
بحبك يا بلدى
وحبك فى قلبى جبال
جبال من الوفا
لسماك لترابك
لكل ذرة رمال
على أرضك يا بلادى
...................
بحبك يا بلدى
وحبك فى قلبى جبال
جبال من حب ودفا
لناسك ولاد وصبايا
شباب ورجال
اللى زرع أرضه
واللى فى مصنعه شغال
واللى بيحرسك بالليل
واللى على الحدود ما ينام
واللى حفر بحره
بشعبه
وصنع فى الرمال قنال
وبأعلى صوته
وقف وهتف وقال
مصر ام الدنيا
وحتبقى اد الدنيا كمان
.....................