معقولة اللي بيحصل ده هو احنا عايشين فين حد يفكرني يمكن في السودان مثلا مش في مصر بقى احنا لأننا في قرية من قرى الصعيد الجواني زي ما بيقولوا عايشين مستحملين وراضيين باللي بيمنوا علينا بيه بقى ياناس ياهووخ عندنا وحدة يسكنها الغربان بقى احنا كنا راضيين بالدكاترة اللي بيبعتوهم لينا والله اعلم بحالهم كانوا ازاي كانوا بيجوا يتعلموا فينا وكنا احنا عاملين زي فئران التجارب بالنسبة لهم وكنا راضيين بكشفهم وبعلاجهم اللي بالبركة ساعة يصيب وساعة يخيب وكنا راضيين حانعمل ايه يعني غير كده لكن على راي المثل رضينا بالهم والهم مارضييش بينا حتى الدكتور كتر علينا بقالنا كتير قوي قاعدين من غير دكتور بالوحدة الصحية بتاعتنا والصيدليه حتى ما فيهاش برشام صداع حتى طب ياناس نعمل ايه لو حد تعب فجأة في وقت متأخر يروح فين وأقرب مكان للعلاج بعد نصف ساعة وايمكن اكتر يعني نموت ونريح بقى حرام ده ولا حلال يرضي مين اللي بيحصل لينا ده واللي مش قادر على مصاريف علاج عيادات ودلع الدكاترة اليومين دول يروح فين حد يقولي يروح فين إرحمونا بقى إحنا بشر زيكم ومصريين نحمل الجنسية المصريه مش السودانيه مع احترامي لبلدنا الثاني السودان من أبسط حقوقنا الطبيب والعلاج تعبنا قوي عارفة ان كلامي حايكون لا حياة لمن تنادي بس الواحد يطلع المرار اللي شايفه على الورق بدل ما تجيلنا جلطة ونفسي حد يسمع يقرأ يشوف بس فين
