دقيت علي بابك قبيل
بستاذنك لحظه فرح
بقة حنان .. ارويبا جوف
عطشان سنين مافكه ريقو بلا الالم
دقيت ومادي حياتي في قرعة عشم
لكن منو البعطف علي
وانا كل حشاي مليان محن
مشحونه بي احلام سجم
مكسية من توب الوهم
تايهه وبفتش عن هواي
ملهية في حضن الزمن
انا في جواي شايفاك امل
ماشه واجابد في خطاي رغم الوحل
كان البينا طريق طويل
وانا ايدي في بابك تدق
تستاذنك تدخل عليك
الا المسافات مالا حد
كانت صدودك لي رد
حتي الحروف اتشردت
ضاعت معانيها وبكت
تاهت مع الاقدار هناك
وانا ياخ هواي زاتو اتمحق
واتشلي حيل الامنيات
الزغردت يوم جرتق الحب البكر
قبال يشيل سوط الفرح
يعزم عليهو
رشوهو بي لبن الفراق
طلقو العذاب تيمان بخور
نزلت دموعي انا زي مطر
كيفن اجيك... تمنعني انت من الدخول
ورجعته صاد منك زليل
واحلامي ياءسه ومؤسفه
شايله معاي شنط الوداع
حرقة واهانه مستفه
وعيونيمن كحل الالم
مرواد هواي انا كحلا
وبي كل غرور سبيت هواك
ولعنت فيك طعم الهناء
سافر مع الاحزان غناء
دوبيت مع الناعي الاليم
وفرشت دمعات العنا
جات الحروف بتنادي لي
لكني كيف اقدر اجيك
وانا حيلي هداهو النويح
وريني كيف اقدر اجيك
وانا كل خطاي مليانه ذيف
احساسي فيك خيب رجاي
ماظني تاني انا يوم اشوف
سكة رجوعي علي مداين زكرتك
الفيها كان حي الغرام
حي العشق
حي الهيام
حي الجراح
هديت بيوتاتا ومشيت
اعفيني جد من زكرتك
دمعي غسل القلب
الكان وسخ بي زكرتك
واعفيني من حرج الكلام في قصتك
وانساني يا الكان زمان مالك هواي
قبلي داب.بعدك صرخ
امنية ادريس
ساحة النقاش