وعن الزوله الملكت  روحي

وأسرار البوح و   الفكره 

واتسرب ريده شويش بشويش

 سكن المسام  والنبره 

واتمدد جوه الجوف 

تحنان  وأمان ومسره

بحكيلكم شوقي 

وكيف حبيته من أول نظره

 🎀🎀 🎀 🎀 🎀 🎀 🎀 🎀 

كنت وحيد انا قبل ألقاها 

وكانت ريدتي دوام للقمره

اناجي شعاعها وكتين تطلع 

واشكيله همومي  ومنها اسمع 

و كان بيناتنا تآلف صادق  

وقصة  ريدا أسمى  واروع  

واصعب لحظه وكت نتوادع    

قبل  الليل ما يسوقه ويرجع   

وهي المحكومه  حكم  رباني 

خله طلوعا من فتره لفتره 

وانا كنت بريده ومفتون بيها 

ولما تغيب  تخنقني  العبره

 🎀🎀 🎀 🎀 🎀 🎀 🎀 🎀 

وكان النيل من ضمن أصحابي

في ضفافو تملي انا بنسى عذابي 

بسافر  ديمه   مع الأمواج 

كل يوم انا بيهو بزيد إعجابي

وانا بتأمل فيهو إبداع الخالق 

شوفت النيل من قيفو يشابي

اتعجبت!! هو شنو الحاصل 

وخل  النيل   يدفق   بره 

 🎀 🎀 🎀 🎀 🎀 🎀 🎀 🎀 

وفجاء سمعت!!  انا صوت خطواتا

زهره يداااابه و يانعه حلاته

بريئة وفاتنه وساحره عيونه 

عفيفه وطاهره نقيه في ذاتا

وفي محياها البدر اتكمل 

و شرقن شمسين من وجناتا 

ولمن تبسم  تضوي الكون  

كأن الحور من نسل صلاته 

 سكنت ذاتي وسلبت فكري 

وحلت بدل النيل و القمره

 دي قصة زوله اشتاقا تملي 

وانا حبيتا من أول  نظره

 🎀🎀 🎀 🎀 🎀 🎀 🎀 🎀 

 

الفاتح ابو لسر 

حب من أول نظره 

7/12/2015