...

دخل ريدك مجاري دماي 

استوطن قليبي وطن

ملك شعري وحروف مغناي 

وجوه الحس بحسو سكن 

بنيتو معاك كل مناي 

وريدتك زايده فيني شجن 

وهبتك حتي عمري الجاي 

وقبلك كان عميري سدا 

 

ايا شبهه الملاك زولا

حلمت معاك بدنيا عدن 

كتبت ورعشه في كفي

غلبني اقول لساني رطن 

 ملكت عواطفي من نظره

رجيتك يوم علي تحن

ومابين عشقي ليك ولقاك

دروب مليانه شوق ومحن 

 

ومن يومي الملكني هواك 

روحي معاك وين ماتكون 

تحوم مابين شوارع الريد

وبي لقياك انا المجنون

اكوسك في عيون اطفال 

وفي صف رمشك انت فنون

صحيح درب المحبه صعيب 

الا معاك كلو يهون

 

قاومت الظروف والناس 

نويت ابنيك مواكب ريد 

وعاهدت العيون تهواك

محال غيرك سواك تريد 

دسيتك في جوف الجوف

لانك ياملاكي فريد

حكيتك غنوه في الاشعار 

وجسدتك حروف في قصيد

 

وياعشقا بدون ميعاد 

بدون انذار ولا تحديد

اتوسد دواخلي وطن 

ملك حسي وغرامي اكيد 

تعال نحلم بيوم باكر

عمر ايامو كلها ريد 

ومحال تبعدنا اي ظروف 

ومهما يكون هوانا مديد 

 

* آسيا الناير محمد*

11/2/2016