تلاقيك تأسرك بالحيل
تفوتك والفكر سرحان
تحسها كانسياب الضو
تفج جوف الحزن تحنان
بنيات البلد بي خير
عشانهن نعزف الالحان
بخشنك وفاء واخلاص
بمرقن والشرف متصان
يسامرنك وداد وحنين
يسرفنك امان وحنان
بنياتاً خُدر سمحات
سماراً بشبه السودان
وعن السودان ؟ تعالو قريب
عشان نعرف شنو الاوطان
بلادي ولا شبيها بلاد
بلاد مستوطنة الشريان
جمال بتحسو في ناسا
دي ناس وناسة ناس اخوان
ولابعرفو النفاق والجور
شعار الطيبة هو العنوان
ما الناس الملانه قروش
دي ناس متوسدة الايمان
قدح كسرة وملاح ويكة
لحاف وسباتة فى الديوان
حبابو الضيف سريع يا وِليد
لعلو الضيف يكون جيعان
وشوفو اخوك يجيب ابريق
ونادى معاك علي وعثمان
يأنسو الضيف كرم طِيبة
يفوت مبسوط وجيبو ملان
دي ناس والله مالا شبيه
تقاقيبهم توج قرآن
حلاة الطيبة لما تكون
في شان الله وبدون نكران
دي ناس تفقد تشوف الجار
كيفن ينوموا لو جيعان
بلادي بنية زفوها
على النيل العَرضَ نشوان
وقالد بالفرح صفصاف
دفق هم السنين فيضان
وانا المستني فوق القيف
حبيبة غيابا قسراً كان
تاهت والحنين سراق
هي راحت ورحنا نحنا كمان
مع الناس التبيع الزيف
فعالهم تشبة الشيطان
يقابلوك والبسيمة شعار
تفوتهم يمضغوك لبنان
وما كل الخلِق واحد
ولا كل البشر صنوان
هناك ناساً يسرو البال
يمدولك عصا التحنان
يقاسموك حبّة افراحهم
يفردو ليك جناحهم امان
وحبيبتي هي زاتا من ناس ديل
حبيبة بتكره النكران
كلاما عديييل مشيها عديييل
حتى قواما حاكا البان
فيا شجرة تلاقي اشواقي
متاكية فروعك الوجدان
برميك بالحنين والريدة
ارميلي السعادة اطنان
يا الوطن الكبير ضماني
فى الحضن الملان غفران
بهواك والهوي اتملكني
ممسوس منو صر(ت) عيان
خليك بالوعود محتفظة
يا كُحل العيون يا (انسان)
فيصل ودالعشا
ساحة النقاش