أم الخير
ياأم ضفاير ليل مجدولة
ياأم الخير ياأصيلة يابهية
ياغنوة حب بناي مغزولة
على شط النيل فى ساعة عصرية
حملناكي أتقلها حمولة 
خدي من حملك حطي عليا
ديابة الغيط وجارتنا الغولة 
مش عايزينك متهنية
إوعي يهمك دول ولا دولا 
سيبيها على الله ثم عليا
إوعي فى يوم ألاقيكى مذلولة 
ولا حتى فى يوم الاقيكي محنية
وإن يوم جالك مهما يجيلك
إفردي ضهرك شدي فى حيلك
هنا ييجي دورنا نرد جميلك
نبقى نجوم بتنور ليلك
نبقى فى وسط التوهه دليلك
نحمي حماكي نموت فى سبيلك
بس أشوفك املي عنيا
بصورة يامصر بتضحكي فيها
ولابسه الطرحة مع الجلابية
لايقه عليكي ولايقه عليها
ياام الدنيا يابلدى يامصنع الرجال
عاش فيكى وليكى يابلدى
عاش فيكى وليكى من قال
أفديكى بعمرى وولدى لو يوم حالك مال
بدعيلك ربى يابلدى تتحسن الأحوال
يحميكى رب القدره يغنيكى عن أى سؤال
ياام النيل ياسمره ياام الجنود أسود
ياراضيه بشق التمره مع إنك أصل الجود
كلها نعمة ربك والجوده من الموجود
يكفيكى الفخر إنك مذكوره فى القرآن
وتاريخنا بيحكى عنك من سالف الأزمان
ياام الأهرام ياأمى والكرنك وابو الهول
لمى ولادك لمى يكفيكى شر المجهول
تمى جميلك تمى ياما ضهرك شال فى حمول
سمى بربك سمى بكره الغمه تزول 
أصبرى واستنى ياأمى واللى بيصبر بينول 
بقلم طارق السيد