حسام فتحي | 07-02-2012 15:26

بالأحضان والدموع والشهقات والولولة.. ودع نزلاء «بورتو طره» بعضهم البعض عقب القرار - الذي تأخر عاما كاملا - بتوزيعهم على سجون مصر، بدلا من «لم شملهم» المستفز في مزرعة سجن طرة.

وأتصور الموقف وعيلاء يقول لجيمي: «خلاص بينا موبايلات.. والواتس آب مفتوح، واذا الآي فون حصل له مشاكل حول على البي بي إم يا جيمي.. صوت وصورة علشان اطمن عليك!!».

أما «عزوز الحديد» فينفجر: «هو احنا كل ما نبرمج «آي باد» تاخدوه مننا.. في ايه هو أنا بقيت المورد المعتمد «للآي باد» في الوزارة دي، منكم لله، وبعدين أمورنا هتمشي ازاي كده،.. ايه يا حبيب فين رجالتك، مبسوطين كده مش قلت لكم متزودوهاش، يعني كان لازم مذبحة بورسعيد، أهي قلبت بغم الله يخرب بيوتكم».

فيرد حبيب امه: «المشكلة في التنفيذ كان «أوڤر» شوية، لكن النظرية صحيحة والخطة سليمة، ما تخرش الميه بس العيال اللي بره تلامذة خايبة، رتب عالية وعقول واطية، كان لازم الواحد يعمل كل حاجة بايده، بس لولا الحبسة السودة اللي خلتنا نعتمد على اللي يسوى واللي ما يسواشي، ومش كل مصيبة تقعد تولول كده زي النسوان يا عزوز ما تسترجل بقى».

يعدل شريف روما الشهير بـ «موافي» نظارته الطبية على أرنبة أنفه ويوجه حديثه لزكروته أبو طويلة: «عارف إننا بنتعامل هنا مع شوية عيال مش محترفة أبدا، فين شغل المحترفين بتاع زمان اللي الجن الأحمر كان بيتعلم منه، الشغل لازم يبقى على الهادي مش تعملولنا فضيحة.. والبهايم بتوعكم يروحوا بنفسهم بورسعيد، ويتقابلوا قدام الناس إيه العبط ده، زمان كنا بنصور كل حاجة ولا من شاف ولا من دري، دلوقت كل واحد معاه زفت موبايل بكاميره وكل حاجة تتسجل، وتتوزع على الزفت اليوتيوب، ما بقاش في حاجة بتستخبى، الا الشرايط والسيديهات، اللي بالي بالك، واللي احنا مسجلينها لحبايبك اللي بره طول ما «الحاجات» دي في أمان.. إحنا كمان في أمان يا زيكو».

يمط زكروته ابو طويلة رقبته.. ويتلعثم قبل ان يرد: «اللي تشوفه يا استاذنا بس الفراق صعب واحنا تعودنا على اللمة والسهر ليلاتي نسمع نصايحك وتعليماتك، ونتعلم من خبرتك اللي مالهاش زي، ده غير حكايات الفنانات والممثلات والافلام اللي كنت بتصورها بإيديك اللي تتلف في حرير، منهم لله اللي حيفرقونا ويحرمونا من الانس اللي احنا فيه».

يصرخ جيمي ننوس عين امه: «هو ده اللي هاممكم يا ولاد الـ....، محدش بيفكر في ابويا الغلبان اللي هيترمي في مستشفى السجن بعد البغددة في المركز الدولي، محدش بيفكر هيعمل ايه في البق والصراصير والناموس.. والراجل مش حمل بهدلة حيموتوه عشان يرتاح الـ(...) اللي بره.. ولاد (...) والـ(...).. طبعا ما بين الاقواس اتركه لخيالكم الخصب حسب معرفتكم بدرجة زفارة لسان ننوس عين امه.

.. قرار التفرقه صائب لكنه متأخر عاما كاملا.

.. وقرار نقل مبارك لمستشفى السجن، لا اوافق عليه لأسباب انسانية، رغم كل ما اقترفه بحقنا، وأعلم ان اغلب القرّاء سيخالفونني الرأي.. لكن وجوده في المركز الطبي العالمي افضل له.. ولمصر.. هذا رأيي وحفظ الله مصر وشعبها من كل شر.

حسام فتحي

[email protected]

@hossamfathy66

اشتراكك في خدمة أخبار المصريون العاجلة على الموبايل يصلك بالأحداث على مدار الساعة

لمشتركي فودافون : أرسل حرفي mo إلى 9999 ـ الاشتراك 30 قرشا لليوم
لمشتركي اتصالات : أرسل mes إلى 1666 ـ الاشتراك 47 قرشا لكل يومين (23.5 قرشا لليوم)

اضف تعليقك
الاسم :

عنوان التعليق:

التعليق:

أرسل التعليق

تعليقات حول الموضوع

عقبال باقى الفاسدين

ادخلو مصر امنين | 12-02-2012 11:25

مقال حلو ودمة خفيف اشكرك ولو ان دة كان لازم يتعمل من زمان وطبعا عارفين الضغوط الى من برة والى من جوة على عدم اتخاذ مثل هذة الاجراءات وطبعا اختلف معاك فى الاجزئية الاخيرة هو مواطن زى اى موطن مصرى بالعكس فية شفراء اتحبسوا وماتو ظلم لكن امثالهم هو دة الحق بعينة

لك الله يامصر

غادة | 08-02-2012 12:50

المقالة جميلة جدا وتضحك من القلب هو ده اللى بيقولوا عليه الهم اللى يضحك اما فيما يتعلق بقرار نقل مبارك كنت الاول برفده باصرار اخذا بالمقولة ارحموا قوم عزيز ذل اما الان فلا اشعر بأى تعاطف معه واخيرا فمشيأة الله هى التى ستنفذ ايا كانت والخيرة فيما يختاره اللــــه.

??????

Abdul Rahman | 08-02-2012 11:39

Do not worry Mr. Hossam they are preparing a 5 million pounds villa for him in Torah. I am really surprised from your objection!!!!!!!

اللاب توب

مصرية | 08-02-2012 10:29

إذا كان معهم لا ب توبات تبقى كارثة

عفواً أستاذ حسام

عمر زقزوق | 08-02-2012 10:20

مهما قيل عن مكانة مصر و حالة هذا الشيء الملقى في المركز العالمي ، فليس هناك مبرر لبقائه فيه و لن أقول إنه فعل و فعل و لكن سأقول شيئاً واحداً قاله خير البرية صلى الله عليه و سلم : { كما تدين تدان } مستشفى السجن يجهز له منذ عام بينما مات من لا يحصي عددهم إلا الله في ذات السجن و في غيره من سجون لا تمت للآدمية بصلة على مدى ثلاثين عاما ، و تعلم حضرتكم كم من مسنين ماتوا في سجونه دون رحمة منه أو شفقة ، فالعدل يقول بالكيل الذي تكيل به يكال لك .. مع وافر احترامي و تقديري لرأي سعادتكم..

نعم بشرط

عادل عبددالله - الامارات | 08-02-2012 09:57

اوافقك ان يظل مبارك لكن بشرط كل اللي عدى الستين من عمره ومسجون يحجزوا له زيه .... وكل اللى اتبهدلوا سابقا ياخدوا تعويض ..... وبكدة كل الناس هتتمنى انها تروح السجن قبل القاعد

يوتوبيا فارغة

وليد الغنيمي | 08-02-2012 08:33

انسانية ... جميل .... واين كانت انسانيتهم معنا ... لا نريد طنطنة فارغة وارتداء ثوب الحكمة البالي ... العدل هو ان يعاملوا بمثل ما عاملو به الشعب .. هذا هو العدل ...لا نقصان ولا زيادة

إلى الكاتب

نانسي | 08-02-2012 08:31

لا نتشفى في أحدولكن حضرتك لم تُعتقل في مدينةنصر مغطى العينين مكبل اليدين من الخلف , يُحقق معك طوال الليل من أغبياءيكررون السؤال 5مرات,وأهم شيء هل الحاكم(الطاغوت)مسلم أم غير ذلك,هل تارك الصلاة مسلم أم كافر,من هو الطاغوت, و الأنكى إستعمال الكهرباء لتقفيل التحقيقات, كل هذا من أجل عيون الطاغوت, وإنني أتمنى ألا يتم إنزال القصاص به,ليس شفقة عليه ولكن ليذهب للقاء ربه بذنوبه و أوزاره وأوزار من تابعه و دافع عنه,أقل شيء أن يُعامل كأي مسجون في برمصر!!

اة ياقفا

خالد توفيق - الرياض | 08-02-2012 07:36

دي مش انسانية دي اسمة عبط وهبل الكل سواسية ولازم المخلوع الرمة دة يعيش زي اي مسجون وينضرب بالجزمة كفاية ضرب علي القفا بقي كفاية

الله يسامحك يا استاذ حسام

مواطن مصري | 08-02-2012 05:15

تقول حضرتك .. الافضل له ولمصر ان يكون في المستشفى العالمي .. سامحك الله .. انا والدي كان عنده مرض السكر وجرح في قدمه سنة 1989 شهر 1 بالتحديد ودخل مستشفى معهد ناصر واكيد تعرفها وكانت حينها حديثة النشأة وجلس فيها بالضبط 22 يوم قطعوه حته حته في قدمه ولما توفى داخل الممستشفى واردنا اخذ الجثة لدفنها طلبوا مننا مبلع4الاف جنيه وكان لايوجد هذا المبلغ معنا فحجزوا الجثة وهددونا ببيعها لكلية الطب وانت تقول مستشفى الطب العالمي والله العظيم زعلان منك جدا والله يسامحك [email protected]

سجن ايه اللى بتقول عليه

ابن حميدو | 07-02-2012 23:20

سجن ايه اللى انت بتتكلم عليه. الغلابه اللى زى حالتنا الل بيترموه فى السجن الحقيقى اما هؤلاء البشوات لهم سجون مخصوصه خمس نجوم ويمكن سبع نجوم لسه ماسمعناش عنها لانها فوق مستوانه السمعى والبصرى.اما مبارك ماتخافش عليه هيكون فى شرم الشيخ السجن المفضل له...دتنا نيله فى حظنا الهباب..قال سجن طره .اهو كله كلام واحنا بنصدق كالعاده

لا ... لا .... لا

ميتو المهاجر | 07-02-2012 21:03

لا تقل كلمة ( إنسانية ) ... إنهم كانوا معنا وحوشاً .... لم تعرف قلوبهم يوماً الرحمة لشيخ عجوز أو أرملة مسكينة أو أطفال يتامى أو شباب حيارى ... إنهم يستحقون الإعدام ثمانين مليون مرة ..

عصابه حسنى والاربعين حرامى

عصام بدران | 07-02-2012 20:52

اول مره اخالفك الرءى يا استاد حسام اى انسانيه تتحدث عنها للمجرم مبارك هده ليست انسانيه ولكنه للاسف اصبحنا نتلدد بجالادينا وفراعينا هل كان عنده انسانيه او درجه من الانسانيه عندما كان يعدب فى سجونه شرفاء مصر ارجوك استاد حسام لا تسحب من رصيدك عند محبيك وقرائك وهم كثر با الشفقه على هدا المجرم عليه لعنه الله الى يوم الحساب بما اقترفت يداه فى حق مصر ,

انت صدقت

احمد ابوطالب | 07-02-2012 20:07

لوصدقت تبقى لم تذهب غلى طره كل واحد أخذ حجرة في الفيلا

خيال لاكن بطعم الحقيقه

ام مصريه | 07-02-2012 18:56

الشله الفاسده كان لازم تتفرق من زمان وباقى ان نتاكد من عدم ومجود اى اتصالات بينهم ولا حتى عن طريق الزيارت امنعو عنهم الزيارت ولو مؤقت حتى تستقر البلد انا سمعت حوار زوجه احمد عز مع عمر اديب كانت منفعله جدا وواضح ان التفريق بينهم مكنش على مزاجها وانها تعلم التدابير وتعتقد انهم ممكن ينجحو ويعود زوجها والحاشيه كما كانو اما مبارك فعليه من الله ما يستحق على تفريطه فى الامانه وخراب مصر واسباحه مقدراتها