برسمك على فروع السطور
اجمل قصيدة موردنة
الوجة طبق بنور
ورموش عنيكى دندنة
وخدودك سواقى تدور
تسقينى كاسها بالهنا
دا أجمل بنات حواء
بيغيروا منك الا أنا
فى حضن قلبى جنتك
اغزل لها حروفى دفا
وألوانها بشفايف بسمتك
وأكتب كتابى على الوفا
على نبضى كانت بصمتك
قام طب ليلى وأختفى
وهلت شمس الشموس
الغايبه عنى من كام سنة
يا رحيل العمر منى
يا راجع طلة فى عينيها
اسأل رموشها عنى
ليه بحن بين ايديها
ونظرة شوق تاخدنى
بالحنان ترجع اليها
ومهما طال الليل عليها
هى برضوا حته منى
ودندنة على أوتار القلوب
وأحلى نغمة على الكمان 
وانا قلبى دايب دوب
يسكر ويقول كمان
كونى لى احلى توب
أو قلة العطشان
وانا على الجبين مكتوب
ولا حد تانى الا انا
________
ولا حد تانى الا أنا
الشاعر محمد ضباشه