شرين سعد أحمد

قصيدة/ ( السويس )
بقلم / ( شرين سعد أحمد )
شاعرة جنوب الوادي
***************
ومين ما يعرفك يا سويس
ولايعرف تاريخ ناسك
وفيكي شهيد بزفة عريس
ودمه سال على ساسك
قنالك حاضن الضفة
وواخد سينا في إيده
وصيادك ماسك دفة
ورزقه ربي بيزيده
ولو نتمشى ع الكورنيش
نلاقي الود والصحبة
وبعد ما كلنا ملح وعيش
محبتنا زادت حبة
وبورتوفيق بتتزوق
جناينها بتتمايل
هواها الدم بيروق
نسيمه للفرح شايل
وفي النمسا بنتمشى 
نعدي يلا شارع الجيش
وفي الشهدا بنتعشى
ونتسامر هناك بشويش
نروح ع الأربعين قاصدين
نصلى الفجر في الجامع
ونسجد بالقلوب خاشعين 
وندعي وربنا سامع
وفيصل حيها الرايق
مساكن شيل تندهله
عرابي الشارع العايق
وناسه والله يستاهلوا
وادي الصباح ودي الترعة
وجوه كويت تلاقي الخير
بيوت براجيلي لها سمعة
وفيها الأصل والتقدير
وللسوهاجية فيه شارع
ومهما تعوز تلاقي فيه
تروح كبريت تقول سامع
غناوي الزرع هالة عليه
وادي الأدبية والأتكة
وادي السخنة بتضحكلك
ودي رمالها ماهيش ساكتة
تقرب منها تندهلك
إلهي يحرصك ربي
ويحميكي بطول الدهر
أنا لا هداري ولا اخبي
بحبكِ حتى أخر العمر

29/12/2018