حبّك جاني في كبري
.............................
ع الحبّ الّي جاني في كبري === اسمعني يلّي ماتدري
عشقتني وشاع خبري === وين أيّامك ياصغري

عشت في البر حوّاس === لانعرف تعب ولانعاس
واليوم ضعفو الحواس === خانوني سمعي ونظري

في صغري درت العجايب === ياحاضربلّغ الغايب
خالطت الباهي والخايب === صوحبت الغني والفقري

لايهمني الجيب المليان === ولايهمني البطن الجعّان
نغنّي مع صوت الكمان === نطرب الحاذق والجبري

حوّست في كل البلايص === في كل مركب أنا الرّايس
عرفت غصرات وغصايص === على كل ورقة رسمت بحبري

وبعد راسي ماشاب === عملتيلي على قلبي بوّاب
بعّدت الأهل ولصحاب === تربّعت كالشّاهد فوق قبري

ماعندي عليك من قدرة === السّبّالة تنكّت بالقطرة
توّة عندي مدّة وفترة === قلمي حافي ماهو مبري

لاتفيد فيه البرّاية === مسحت الماضي من الحكاية
حتّى لو قعدت بحذايا === تلقيني نرعش ونفبري

ناقوسي ماهو رنّان === والشّاشة فقدت الألوان
الله يسامحك يازمان === حيّرت مواجعي و فكري

عبدالسّتّار زرّوقي
08/4/2012