يَامِّيمَة يَاعِزِّ الخَـــــــلْقْ
=============
لو تِتْمَدْ كُلْ كْفُـــــــــوفْ........لَوْ تِتْسَاوَى كُلْ حْـــــــرِوفْ

مُحَالْ نْمِدْ يِدِّي لْغِيـــِركْ........ياَ مِّيمةَ أَصْلِ المَعــْــــروُفْ
ْ
لانِمْدَحْ غِيرِكْ بِكْلامِـــي........لَوْ مَدُّوا مِيّاَتَ أَلـُـــــــــــوفْ

مَاتَحْلالِي حَتَّى وْسَادَة........حُضْنِكْ عِنْدِي حْرِيرْ وْصُوفْ

تِكْفِينِي دَعْوَاتْ صْبَاحِكْ........تَحْمِينيِ فِي كُلْ ظْـــُروفْ

تِفْتَحْلِي ثْنِيَّة قُدَّامِــــي........اطَّمِّنِّي فِي سَاعَةْ خـُـوفْ

دَعْوَاتِكْ يَامِّي تَحْفَظْنِي........لا تْخَلِّي سِتْرِي مَكْشُوفْ

بَعْدِكْ مَايَحْلالِي طْعَــامْ........نْعُودْ عْلَى طْبِيخِكْ مَلْهُوفْ

شَمْسِي مِنَّكْ كَانِتْ تَسْطِعْ....بَعْدِكْ خَبَّاهَا الكُسُـــــوفْ

وِالْقَمْرَة اللِّي كَانِتْ تِضْوِي......ظْلامِتْ غَطّاَهاَ الْخُسُوفْ

عْلِيكِ غَنَّى كُلِّ النَّاسْ............رَقْصُوا عْلَى دَقِّ الدُّفوُفْ

يَامِّيمَة يَاعِزِّ الْخَـــــــلْقْ........رَحْمَةْ رَبِّي عْلِيكِ صْفُــوفْ

**عبدالسّتّار زرّوقي

2011/12/22