برنسيسة زمانك
جافلات القوافي الأصبحن يرتعشن
حايرات بالعلي حالفات يمين ما اتعشعن
رغم الشوق أبن يرعن عليك إتمشن
من وين أبدا فيك شردن ومنِّـنَا طشن
&&&
الزول العزيز الليلة ناسي أحبابه
مِن كتر الدلال قافل جميع أبوابه
مِن دون الخلق راجيه باردة أعصابه
بالسهر الطويل أنا قلبي زاد ضرَّابه
&&&
الليل البهيم شربكني طوله لعله
وصاقرني النويح يا خلي كيف مِن حله
وكتين المنام ما بسوقني ليه أصله
باريت السهر سكران بقدله ودله
&&&
برنسيسة زمانك ماكي قاطعة وصالي
أغشيها الجروف أسقينا حِـنَّـك حالي
مِن طيب الجزيرة الخضرا جاك موالي
يا دعاش الخريف زوري القليب طوالي
&&&
يا ست البنات بهديك وداداً صافى
يا غالية وحنينة ورايقة زيك مافي
بدعوك يا كريم زيد ليها مِن المافي
زيد بينا الوصال نشرب سلافو الشافي
&&&
أنا لفيت كتير جد ما لقيت ليك تانية
زايدة على البنات فارعة وشتولك بانية
زيدي علي هواك قيديهو في كل ثانية
خليني اتحرق دي الدنيا أصلها فانية
&&&
شبهك في البنات معدوم ومافي مثيله
والريد كان بلاك حرمان علي تحليله
أنا الخلاني في ريدك سكنت نزيله
نقاع الحنين صنقعت قاصد أسيله
&&&
عاد يا ظبية بيفرحني إن بقيت مداحك
أغرد بى غلاك صبحي ومساي صضَّاحِك
تسلمي مِن شرور عطر الورود فواحك
منك ما اكتفيت من ربي دايره صفاحك
ساحة النقاش