الهوى الغلاب

حارت بلاك نفسي واخترتِك إنتِ هَنَاي

ودِرْت فيني بلاك وخِدِرْتَ فيكِ معاي

ما بين حقيقة جنون ما بين خيال ورؤاي

يا نافرة مِن روحك وأنا مِنِّي ليك سَرَّاي

ريدك دفقني عليك وعليك دفقت مناي

شَرَّيت عليك أحلام فرحي العمربو سماي

وحلمت بيك عروس يا دايبة في جواي

فيك الجمال فنان وأنا فني بيك رَسَّاي

يا زهرة في بستان عبيره يلفح سَاي

فيك الوسامة شموس بيك يا غزالة هواي

وغلبني ليك أصيد شَبَكِي القبضني براي

وغرامي بات مسجون في خدك الضواي

باريت هواك مرات كان أغلبك حاشاي

ما كنت داير قون قلت الدرون وكَفَاي

توهني صَدِّك دوم وهجومك الجارَّاي

فيك النظر شوات قَدَّ الشباك رمَّاي

فيك الدفاع سداد خيب هجوم مسعاي

حاورت فيك الذات جرجرت بيه بلاي

ووصلت لى مرماك ساعة فَقَدْ مرساي

حاولت سجل فيك دخل الهدف مرماي

وقنعت مِن جريك ورجعت ليهو غناي