هواجس الريدة

بس قولي لي أعمل شنو؟ وعارفِك حقوقي مَكَتَّفَة

كيف أعْتِقِك يا سِتِّي مِن سمسار حياتنا المجحفة؟

لا داير يوقع رجعتِك وتكون أموري مرتـَّـــــبة

لا راضي أدفع ليو مناي وأديو رويحتي المتعبة

لا داير يبيعك بالعلن لا راضي يهديك لي رضا

ظالم وراهنِك للقدر وديوني رافض يسددا

عارف حظوظي بلاك رماد وحسابا شاهرُه تمردا

واسوقا مجرور مِن زمان بس ماف طريقة أمدِّدا

وأنا لو علي بحضن شقاي بربط همومي و أكـرِّبا

وبَهَدْهِد الشوق النُّواح بشفي الجروح و بَطَبِّبَا

ما بشكي ليك مُر الرحيل لو ما نويت قُربِك دَفَا

ما بشكي ليك قُصر النظر بشكي الخلوق للخالقا

بستعطف الرحمن يجود وخزاينه يفتح اسقفا

وأنا ما يئست مِن الصبُر بُد لي قناعة مُكرِّبا

إن يوم حمامتَك فاتتك مَا تَفِر وراها وتلحقا

ما بنفع الإتنين سوا يا إمِّا طيران أو حِبا

خليها تنزل بارتياح وإن ليك نصيب تتحسسا

أقبض عليها ودَسْدِسا في توب حيائك دَبِّسَا

مِن أجمل الأخلاق عباية قَدُر مقاسك فَصِّلا

وبراك ومِن دون اختيار بسمل عليها ولَبِّسَا

وأزرد شواويلك حنين لا حَد هناها وافرِحا

راضيها يوم تعطش جفا واسقيها ود و ملاطَــفَة

قسم مشاعرك ليها ضل ما الريدة عدل و مناصفَة

والدنيا ما تزيدك ظنون أنسها بعد المعْـرِفَـة

ما تجري ليها عشان تجيك خليها تجري ورك حِفَا

سيب البفوت حدو وأقيف خليه يرجع بالقفا

ما تسوق هواجسك للظروف خلي الظروف في أظرفا

ما تسوق هواجسك للظروف خلي الظروف هي مَظَرَّفَة