<!--
<!--<!--<!--
منية
جارفني ليك شوقي الدفين
شايلاني أموج الحنين
سايقني ليك عبر السنين حق الولف
يا نابعة مِن وهج الشموس
يا ماخدة مِن النيل وئام
يا السارحة في الحق و الوطن
يا واهبة لحبي النَّفَس
خايف عليك أنا مِن هواي
لمن أقوم أتلهفك
ساعة بتمشِ على الأرض
خايف عليك ما تَحْسِدك
ساعة يمر بيك النسيم
خايف عليك ما يخدشك
يا ناعمة أكتر مِن خيال
يا صدفة في الزمن المحال
يا الرافعة رايات الوصال
يا نادية في شمس الضحى
وست الجلال
يا سايبة جواي طيب هواك
حد الصفا وعين الدلال
يا نجمة في وسط القلب
ميـــــــــــــــن بشبهك....؟
يا أسمى ساحات الجمال
أنا قلبي في حبك وريف
وجداوله ماليها الأمل
أزهاره مِن بسمات شفاك
أنواره براق المقل
ألوانه مِن صندل بهاك
يا منية بس كيف أوصفا
وخضاره مِن طيب الأصل
ساقياه مِن طلة نداك
نايرات شتلوه مفرهدا
وأنا ما في يوم خليت وراي
أحلام صباي
و أنا بيني بينك كوم عهود
مردومة في عمري و شقاي
معقودة بالروح و الفرح
مربوطة بالري و الحياة
مكتوبة بالنور في السما
مِن كل ألون قوس قزح
مخلوطة بالدم و العشق
لازم أصل وأحققا
شان أوصلك
رميت قليبي على السفر
وربطا في شوقي الحجر
وعملت مِن أحرف غناي
مجداف وطوق
وحماية مِن موية المطر
ما كنت خايف مِن رياح
ولا كنت خايف مِن برق
ولا حتى مِن غدر القرش
بس كنت بخشى على القليب
ينقدا مِن شوك القدر
يغرق يموت وأموت وراه
وتسيل أمانيه في البحر
يبقى العشم فيك انقطع...؟
يا منية بعدك ماف عُمـُر
لو ما وهج عينيك سطع
أصلو المبلبل في أمل
ساقياه مِن فيضك حنين
لا بد يعوم شان يوصلك
لو حتى ينقصَّ الضَّهَر
وأنا بوصلك
لو المجاديف تنكسر
لو حتى أصنع لي حروف
أبني المجاديف مِن سهر
وأعمل مراكبي مِن الظروف
وأبحر على دفق النزيف
وأفرد شراعات الأمل
مشدودة مِن آلام و خوف
أنا بوصلك
لو ينقطع مدي و تقيف كل السفن
أنا بوصلك
لو مافي موج يخطف محطات الزمن
أنا بوصلك
لو مافي ريح تدفع شراعات الحزن
أنا بوصلك
لو مافي قيف يحجز صبابات المحن
أنا بوصلك
لو مافي نور يطرد سحابات السكن
أنا بوصلك
لو مافي فال يطرب غنيوات الشجن
أنا بوصلك
لوتبقى كل الأرض زيف
أو تندفن كل المدن
أنا بوصلك
لو مافي مرسى عليه أقيف
بعمل حطام أعضاي رصيف
لازم أصل
شان أرسى بيك
يا أغلى منية و أحلى طيف
يا أزهى مِن جنة عدن
يا غنية ليك لازم أصل
وأحياك مواس الإندياح
وتهل تباشير الخريف
وأصل معاك حد الصلاح
وألقاك ربيع عمري الوريف
ساحة النقاش