<!--
<!--<!--<!--
طرف العِصير
أنا كل يوم
بقعد على طرف العِصير
متوهِّط الإحساس كمال
غرقان في بحر الأمنيات
متقريف البن بى حداك
لمن تدُقِّي على القليب مِن فندقك
تَفْتَح بيوتات الحُجا
تِتْحَكَّر أنفاس الجمال
تطْرِب نفوسنا وتبهجا
وكتين منيقِيدِك يهز
ويكون وقوده مِن الأمل
هبوده يطرد للغبار
نيرانه ما مكتولة ضي
هبابة بزيد الجمر ولعة وحَمَار
ومُبَرَّدَا السادرات عطش
ومرطَّبَا الرملة المرشرشة
من دَفِقْ حنيتك الجوف المحرَّق والديار
لهجِك على الفنجان بصب
نَقَّص مرارة الانكسار
وحلاته قِرْميش الفُشَار
وقربنا جارين العيال
ناسين سخانتك يا عُـمُر
بالجوطة والشَّكَل الهظار
محتار براقب في الشمس
الكان قبيل شرقت دغيش
واتوسدت جوف الوطن
الشاربة عِزَّ الهم وقار
والضاوية لا سقف الوضوح
ليه شاردة مِنْ حَر النهار..؟
راجي الغروب يعطف على الشوق الضِهِب
بى حَرُّه يسلع في القفا
يكوي الوشيش الكان صباح
عشمان مأمل في المزار
وعيونه ماليها الضباب
وحياه مكتول بالحياء
وعيوبه بالطول و العرض
وخدوده مشحوبات صفار
إنسان ومجبور بالشقا
ويديه يابسة مِن الخدار
حرَّاق نهارك يا زمن
وعذاب هروبنا على السراب
والنيل جريه مِن العطش قاطع النِفيَس
كايس الضليل مغرم رهاب
وحرام هروبنا على الضلام
وحرام يكتحنا السهر
وجيوبنا فاضية مِن الحلال
وجروفنا مزروعات فَقُر
نحصد نهاية العام صبر
ودروبنا كلها انتظار
حنيت عليك آ السمحة يا رطب القفار
مَسَّاحة الزيف في الصدير
مقشاشة الغِش والتراب
الكان بغطي على الودار
نضارة الأعمى البقول
عز الهجير ما بشوفلو عار
سماعة الطَّرَش البسد سمع الرجال
عكاز قُوَاي يوم الضِّهير محمول و محني مِن الحمول
يوم العيون بتخاف يغطيها الحزن
ويكون حليفها الاضطرار
ساحة النقاش