يا قافية...بقلم / الشاعر محمد حسانين

يا قافية جاية بالعافية والراية مكسورة

شفتها بتجرى بتصرخ وصاحبنا عاقد القورة

لا حلول ولا أجوبة شافية والولاد إتشالوا م الصورة

الكدبة صارت حقيقة والحلم صبح أسطورة

الماضى القريب عشته غريب وأدينى بغادر المقصورة

رحال زادى الكلام بدور على بلاد بالحب معمورة

يا ولاد الناس النيام هتموتوا م السكات زى الناس المغمورة

وقفت خلاص قطرات الحياة وقفت بس مجبورة

دموع الغلابة بتداريها الإدين الشقيانين المقهورة

وأصحاب المعالى السامية على العرش قاعدة مبهورة

بركان الثورات صبح رماد باعوا الولاد فى محطة كانت مهجورة

طلعوا الغيلان بسبع ألوان زى الحرباية ملعونة

ألسنة تبيع تذيع كدب الأمانى للكروش المسعورة

بوريه منك لو تضيعى أضيع معاكى وتضيع معانا الصورة

يا شمس نرجس فين ربيعك فين ملامحك فين عيونك ...

معقولة ضاعت فى الميادين كل الغناوى المشهورة

يا ثورة قومى شدى حيلك بناديلك ليوم ميلاد تتصلح فيه حال العباد

ويرجعوا ولادك يزينوا الصورة