السوق
السوق زحمة .. مولد وصاحبه غايب ..
بياع وزبون .. وزبون شاطر .. وزبون خايب
وزعيق كتير .....
دا خناق .. ودا بياع بينادي ع الحبايب
كرنب مورق .. حلو مزوق .. تعالوا ياستات
بطيخ حلاوة .. آخر نقاوة .. زي الشربات
فول حراتي .. عنب بناتي ..
جوافا و تين .. يا مين يشتري مين
مانجا عويس .. تيمور .. زبديه ..
انتَ فين .. يا مشتري .. انتَ وهي
موز مغربي .. ما تصلي ع النبي
حلو الرمان .. يا بتاع زمان
تفاح الامريكان .. ماتكنش زعلان
اتنين كيلو هنا .. مين يقول كمان
بامية مقمعة .. بتنجانة مسقعة
فلفل حراق .. لهاليب الاشواق
ملوخية .. قلقاس .. لأجدع ناس
بصل احمر .. بصل اخضر ..خس و جزر .. يقوي النظر
جرجير .. كرات .. بلح امهات ..
بطاطس تحمير .. بتنجان تأويير
كوسه يا محشي .. اللي عايزه تحشي ..
قوطة يا مجنونة .. صفرا يا لمونة
فلفل رومي .. فراخ فيومي .. مين يقول هات
شمام .. تمَام .. بلح الشام ..
سكر بنات .. حلويات
عيش طري .. سمك .. جمبري ..
السوق زحمة .. ماليان ستات
ست حامل جايبا جوزها .. يشيل عنها وكل شويه تقوله : هات
وست شاطرة حابه جوزها .. وبتجيب له احلى الأكلات
وست ماشيا .. لاويا بوزها .. اصل جوزها .. ماسبش غير جناهات
ماهو فـ السوق .. بنسمع كتير ونشوف حكايات ..
ماهو السوق زحمة .. رجاله وستات
اشعار .. سعد المهدي