كرسى البرلمان شعر... بقلم الشاعر( البرنس الجوجرى )

كرسى البرلمان شعر... ( البرنس الجوجرى )

وســــع لى ياخويا وســع *** أنا عايــــزكرسى البرلمان
دا واحشنـــــى قاعدتــــه *** ومخدته الطريه من زمان
واحشنى تعسلته وتكييفه *** لما أكون مش فاهم وحران
واحشنى هيصته ودوشته *** بقيــت من غيره كحيــــــان
لا عدت باهتف واسقـــف *** وأوافق وانا جاهل وعميان
بطلت اشيل ظرف الورق *** تحت باطـــى دنــــا زعلان
كنت ألف بيه على الوزرا *** أطلب العطف والإحســــان
شغلتى بس أنقل واعيــن *** واسند المفسد والفســدان
أقضيله مصلحته وآخــــد *** أجرتى منــه واخلع بكل أمان
وحشتنى القروض الكتيره *** اللى من غير فوايد وضمان
والأراضى النهيبه وببلا ش *** اللى يجرى فيها الحصـــان
كنت أأقف مع أى مخالف *** بس يكون جيبـــــه عمران
واتوسط فى كل حاجــــه *** والكـــــل يبقى منها كسبان
وظايف مبانى مخالفــــه *** أى تعدى واسند الجدعــان
شيلنى واشيــلك والورق *** ييساوى ولا أىحاجه تبان
تخرب ما تعمر هى بتاعنا *** مالهاش صاحب والكل سهيان
دا مولد وصاحبـــه غايب *** مفيش مراقب والكل شبعان
آه ياعينى على الحصانه *** اللى كانت نفعانى فى كل أوان
لا كان يهمنى وهى معايا *** أى رتبه أو منصب مهما كان
كل الابواب ليها مفتحـــه *** ويعظملها ويقفلها أى إنسان
كنــت من غير ناخبين أو *** صندوق أنجح بدون إعلان
أدفع المعــلوم للمعــــوم *** واركب الكرسي زور وبهتان
أدور على رخصه تقيله *** أو توكيل ابقى بيه دفيـــــان
وطــظ فى أى معـــارض *** عاملى ديموقراطى خيبــــان
قالــوا علينا فلول قــــــال *** دا إحنا كنا أصحاب المكـــان
نفسى يعــود الزمن تانى *** ملعونه الثوره بكل لســـــان
بس هارجع ازاى نائــب *** والدنيا اتلخبطت والحكم كمان
أنا ماعرفـــش غير أزور *** منهم لله بتوع الثوره والميدان