الشاعر الزجّال حمادة البهلوان "بهلوان الشعر العربى"
النُّصرَة لغزة
*********
بقلمى / حمادة البهلوان
******************
هَزّت قلوب مِـ البشر عَطف ومالِيه عِزَّة
وناس قلوبها حَجَر ماكانلهاش هَزَّة
يكفيك يا أرض الشرف صَبرك مع صمودك
تستاهلى مِنَّا الدُّعا والنُّصرَة يا (غـََزَّة)
***
واجِب علينا نقوم وتقوم لنا قُومَة
يا أُمَّة مِتكَتِّفَة بالظُّلم مَحكُومَة
قَامِت عَشان النَّبى كَام مَرَّة غَضبَانة
رافعة رايات الحَق وهِيَّا مَهزُومَة
***
والحق صوته اندبح من عزم قُولة آه
يصرخ ومين يسمعه ، ومين يرد صداه
اتعرَّى من عِفته ودنِّسوه الملاعين
وكل مِن ينصره يبقا عدو الله
***
يتقام عليه الحَد ويكون دا يوم موتُه
ويخُش فـِ اللستة ، ونجاتُه فـ سكوته
لَيبيع كما باعوا ويمشى جُوَّه الحيط
لَيضيع كما ضاعوا ولا حَد هَيغِيتُه
***
خَلُّوا البرئ مُتهم واتسمَّى إرهابى
وقالو دمه حلال والحكم ده غيابى
واللّى يشوف غير يبقا شريك ويَّاه
لَينخرس ، لَيموت ، ونقول ده متغابى
***
مين دا اللّى يقدر مين على شلة يهودية
الخِسَّة من طَبعُهم ، والقتل دَه غِيَّة
والدَّبح للأطفال فِـ شرعُهم مَقبُول
ولا عُمرُهم هَمُّهم شرعيَّة دوليَّة
***
يا دنيا مالك كده حالِك بَقَا حَالَك
الظلم والافترَا أصبَح طريق سالِك
الغاصِب المُعتَدِى فارِس وصاحِب حَق
والأعزَل المَدبُوح مَملُوك ومش مالِك
***
يمكن يكون (منتظر ) لَمَّا رَمَى الجَزمَة
نَكَش عَرِين الأسَد وصَعَّد الأزمَة
والأزمَة مِتصَعَّدَة جَاهزة كَمَا العَادة
لكِنُّه أَهيَف سَبَب وحكايتُه مش لازمَة
***
نَاب الأسد مَسنُون والغَدر بَان فِـ عنيه
نازِل لُعاب الجُوع بيسيل على شَفَتيه
دايس فى خِير أرضِنَا يلهَط على كِيفُه
لا (القٌدس) هَتشبَّعُه ، ولا (العِراق) تِكفِيه
***
و دِى خَطَّة مِدَّبَّرة ، ومؤمرة أَزَليَّة
من يحمل الإسلام مَيِّت مالوش دِيَّة
هَانقول عَشان أقويا والضَّهر أمريكا
أتاريها مِتصَهينَة، والحَرب صَلِيبيَّة
***
(غَزَّة) يا أرض الفِدا جَرحِك لازال غاير
نَصرِك قوى رغم اللى فيك صاير
يا ام الشهيد افرحى دى الجنة مشتاقة
نادت ولَبَّى النِّدا، والنَّصر لُه بَشاير
***
