( مجله ك الخواطر ) ::: إِبنـِــــك الحِيــــــلَه ::: للشاعر المميز / ايهاب الشابوري

وليه بقـه تهربـــــــى منى؟ 
وإيدِك دِيا تِظلمـــــــــــــنى 
يِجيلك قلب تقوليهــــــــــا؟
تِقولى إنــتَ مُــــش إبنِى
.............................
عشان صرَخت فِى وِشك
لما الفساد سَـكَن عِشك
وعِينك نَبِتِت غِربَــــــــــان 
تِفَرع غُلب عَلى فَرشِـــك
.............................
عَشَان استغفرت لِذنُوبِـك
ورُوحِى نَضَفِت تُوبِــــــــك
وأقولِك تُوبِى مَاتِـــــرضِى
تِعَاندِينى وتِدمنِى عـيُوبِك
.............................
دانَا بَرضَى بشويِة فُــــول
وهدمه تِعدِى بىّ الحُــول
وعَلام مَعدش لُه عَـــــازه
وسَقف تَحتُه مالِى عزُول
.............................
أقولِك ضُمينِى فِـ نهَــارك
تِرمِينى وتُحضُنى مُبَـارك
جوَازة الشُـــوم وآخـرِتها
لَقيتنِى غِرقت فِى عَارِك
.............................
كإِن قَارصنِى مِية عَقرب
كارِه نَـفسِى و مِتكهـرب
بِألف يَمين مَانا رَجِعـــلِك
حَالِف لأسَافِر و هَتغَـرب
.............................
دَا قطرِك دَا ولا نعُـــوش؟ 
عَليها دَمى صَار مَنقوش
فَايت بَرك وهَركَب يَــــم 
أتَارِى يَمِك كُله قـــرُوش 
.............................
ويِوحَشنِى فِـ غُربتِى ذُلِى
شَفِيقه نَدَهِـــت يا مِتولى
بَلِّــم غُلبِى فى الشَــنطه
وبَرجَع بَـــــس مِش كُـلى
.............................
بَرجع تااااانى مُشتَاق لِك
دَرويِش أبُـوس تُراب أهلِك
وبَترجَاكى عَشان خَاطرِى
ذلِينى برَحمَه علَى مَهلِك
.............................
قُوليلِى غِلطت إِنتَ كمَان 
بِدَمعى أقُولك آنَـا غلطَـان
دا اللى مَقالشِ فِى عُمره 
كِلمة حَـق يبقىَ جبَـــــان
.............................
هَحطط عَن راسِك الشيلَه
ولَجل مَا تِرجَعى جَمِيــــلَه
بِعِلو صُوتك يَا مَايَـــــــــــــا
قُولى أِنى إِبنِك الحِيـــــلَه