ح اكتب لكو مكتوب مقلوب ، بعد ما طال صبري 
وإبقوا إنسخوه بخط واضح ، وعلقوه علي باب قبري 
وقبلها لو شوفتوني ، بصوا ف عنيكوا وإتأملوها بجد 
وقولوا لعيونكم تتأملكم ، ودوّروا فيها ع الرّد 
وبلاش تسألوا عينتينكوا : هو عمل فينا ايه ؟ 
ولا تسألوا بعض : ساكت ليه ؟ ومقموص من إيه ؟ 
وبلاها أيتها سؤال مخنوق ، ما تقدروش تجاوبوا عليه 
أصلها تربيطه حويطه وغويطه ، وجلياطه ومطاطه 
ولا كانت مسنوده علي أرض ، ولا حيطه ولا بلاطه 
مش الأصول اللي عرفناها زمان ، منّنّا تاهت ؟ 
والناس خسرت أحلامها ، واللون بقي باهت ؟ 
والصمت إترتّب ف الكتم ، ما بين الأم وبين عيالها 
البيت يتحوّل سجن وسجان ، وكانه محروس بالجان 
لا كلام ولا رد بجدّ ، وعينين مشحونه استهجان 
الزنزانه مسكوكه تتحول مسكن للأب الشرقان 
@@@@@ 
وسأل روحه ، بينه وبين روحه : هو جري أيه ؟ 
واقفين قبالك كده ليه ؟ ومستعجلين علي ايه ؟ 
والعمر اللي فاضل لك لو طال ، ح يطلع قد ايه ؟ 
أسبوعين او شهرين ، أو ما يزيدش عن الساعتين 
دا كل شئ ممكن يحصل ف زمن مشحون أسافين 
وإحساسك بالنهايه الجايه قريب ، ح يوديك فين ؟ 
أوعي تقول لي إني استسلمت ، أو إني سلّمت 
أو حتي ضعفت أو إنسحبت 
ودفنت عزيمتي أو اتهدّيت ويئست 
إنت شايفني با أعافر ، وباقي معاهم ولا مسافر 
ح تفرق إيه سفرية موت بيحوم حواليك ، لو عشت ؟ 
سنه تانيه تزيد ع العمر المحسوب ، ولا إنت تعبت ؟ 
ما هو يوم البني آدم بيجيله ، من غير ترتيب 
لا ح تملك ولا تقدر تتأخر عن يومك ، ساعه او ثانيه 
ولا تقبل فكرة انك تنهي العمر بإيدك ، وتغيب 
ح يجيلك يومك وتغادر ، و ح يفضل منك حبة ملاعيب 
قلتها شهادات صدق بحساباتك ف زمن كداب وغريب 
زحمه لمواهب حقيقيه كانت بتقول ، من غير خوف 
وأنصاص وارباع وشوية فرافيت ، وفقها ف كتاتيب