أنا المسجون ف حُضن الليل
وانا اللي ف سجني وحداني
وانا المحشور ف بطن الويل
ودمعة عين مصحباني
أنا النايم على الأطلال
وانا الحُزن اللي ف الموّال
وانا اللي ف ضحكة الزلزال
لقيت كوابيس محوطاني
أقول تاني ؟
أنا العاشق بقالي سنين
وفارش حضني سجاده
وانا اللي ف سكّة العاشقين
حكايتي تكون فوق العاده
أنا الحلم بتفاصيله
وانا ف الليل قناديله
وانا اللي النجم بيجيله
ويهجر دنيا ناس تانيين
م انا الورد اللي ف البساتين
وانا للورد بُستاني
أقول تاني ؟
أنا اللي ف حُسنها طبّيت
وروحت وراها بالمشاوير
أنا الصيّاد وفجأه بقيت
فريسه وبين شِباكها أسير
أنا المشتاق لضمّتها
وانا المصلوب ف عتبتها
وانا اللي حياتي خلّتها
عذاب ودموع وجرح كبير
ف قلبي الحُب بالقناطير
وهي بقسوة جرحاني
أقول تاني ؟
خلاص فقد الكلام معناه
مالوش لزمه الكلام يتعاد
مدام حُبّي الكبير بيعاه
وراميه القلب جوّه مزاد
ألا أونا .. هنا التاجي
ألا دوّا .. هنا الأبهر
ألا تريّا .. هنا أورطى
وانا دايخ على واسطه
عشان تلحقني من تاني
لقيت واسطه يادوب علشان
تعلّي السعر
بقلم /سيد منيرعطيه
من ديوان/سكران حب
