يا وردتين
فايتين غصونهم دبلانين
رايحين لفين ؟
ما عادشى الشوك
بيحميكو ؟
ولا الخضار فى الطين نشف؟
ولا عادشى يرويكو
يا وردتين شمس وقمر
إيه الخبر ؟
طرح الكيماوى والبلاوى
ليه يعشِّـش فى الجتت
والزرع شارب م الحكاوى
والغناوى
بيقطع الأمعاء ..حتت
واحنا الغلابة الطيبين
راضيين بحتى لو مفيش
راضيين
كان العبير يطرح
وبيشبَّـع جعان
كان المكان ما يسعشى
حاوى وبهلوان
ولا ...ألعـُـبان
كل السواقى
كات تلف ف أرض خير
دلوقتى ليه بتلف عكس
وما تلاقيش
غير أرض بور
تروى
وتروى.. وكل شبر بألف نار
وكأنها بتوزع الحلم بسُـعــار
بطلنا نحلم
أو حلمنا ضاع فى الجحور
يا مولى كل المظلومين
فين الأضاحى والنذور؟
فين الطريق ؟
فين الخطاوى الممكنة ؟
ولا خلاص .....
الجوع وفقر المحرومين
بقى نسخة تانية مننا؟
خيالات وسارحة ع الحيطان
شواكيش وبتدق الصدور
تطرح مواجع بالمآطف والأفف
الريق نشف
الجوف نشف
حتى السما ما بقتشى تبعت م المطر
غير الشُـهـُب
ونازلة تحرق.... بس مين ؟
ما كتير فى شكل الإنس
لكن
جوة منهم مردة ياما
وشياطين
بطلنا ما نحسش و دخان الحريق
ما نفرقوش ريحة البخور
ولا خلاص خدنا اننا..
عايشين نشوف الضلمة نور
والوردتين اسودّ لونهم م الأنين
ودة ذنب مين ؟
.............
بـــقــــلـــــــــ م ا لـــشـــــا عـــــــــــر
أ بــــــو عــــمــــــــا ر ا لـــمـــصــــــــــرى