أنا واقف على بابك
وجنبى من الغلابة كتير
بصوت مبحوح ياما نادى
وما لاقى فى البلد دى كبير
وناس مرصوصة بشكاوى
ورقها داب من الحرمان
وعيون غرقانة فى دموعها
وبتخبط فى كل مكان
وأنا تعبان .... وأنا ساكت
وأنا تعبان .... وأنا صامت
وأنا تعبان ..............
وأنا بشكى .. وانا بحكى
وأنا واقف على بابك
وشايفة كل يوم مقفول
ودا معقول
وأنا يا ست الكل فى رحابك
أنا هستنى اية تانى
وأنا ماشى مادد أيدى
أنا هستنى ايه تانى
ودمى بيغلى فى وريدى
وأنا بايدى
ولا بأيدى
ولا بكام كلمة بكتبها هغيرها
وأنا شايف قصادى كتير
وانا شايف كلام تضليل
وأنا حتى ومش شايف
بقيت شايف كلام بحروف
تاخدنى الكلمة على معنى
أموت من الخوف
وتبعدنى الكلمة عن معنى
أبات ملهوف
ليوم تفتحى بابك
لأحبابك
لناس على الرصيف قاعدين
على هدمة
على لقمة
على حقنة
على شغلة
على قرشين
بحسوا بانهم حاجة
ولو طائر بدون جناحين
أنا طربوش بزر أسمر
أنا عمه ماليها صوت
أنا سماعة ما بتسمع
أنا كلمة خنقها القوت
أنا شارع ومش شارع
أنا ترعة وعطشانة
أنا ساقية مابتلفش
أنا وردة ودبلانة
أنا نجمة على كتفى
بريقها راح ومن بدرى
ودا قدرى
أموت يا حبيبتى فى ترابك
وارحل ...
وأنا واقف على بابك
...........
...........(صمت)

وناس واقفة بقالها سنين
ومهما تعملى فيهم
بيطبلوا كما المجانين
وماخدوا اى شيىء ليهم
وأكون ثاير فى وسط الناس
وفى التورة راحوا الدراعين
راحوا الجنهين
راحوا الولدين
.......
......
......

وصوت منى خارج يسأل
هو أنت يا بلدى فين ؟
وفين بابك ؟
ومين واقف على بابك ؟
ومين جوا ومين برا ؟
ومين هاصوا ؟
ومين لاصوا ؟
ومين داسوا ؟
ومين ماتوا فى الزحمة ؟
بلا رحمة
وأنا واقف على بابك
صحيح أنسان ؟
ولا صورة منسوخة
ومرمية فى كل مكان
لها أسماء وما تعدش
لها بصمات من الأحزان
لها طربوش على كرسى
لها عكاز ومالو أمان