يجوز ف الحب شوفت كتير
وعشت عذاب مالوش أخر
لكنّي كُنت بتحمّل
وعمر القلب ما اتاخر
ولا اتراجع ولا اتزحزح
وكان ع الصبح يستفتح
بكام دمعه وكام أهه
متاهه تجُرُّه لمتاهه
يقع ويقوم
وكان يرفض يبات مهزوم
يعيد الكرّه م الأول
ويتعذب ويستحمل
لغاية لمّا فاض الكيل
ف قرر يبتدي التغيير
هجر أرضك بدون تفكير

وراح لطريق بعيد عنِّك
لكن صورتِك .. مافارقتهوش
بدأ يمرض وزاد دائُه
وزاد ف البُعد أشواقه
كأنه ع الوجع بيعيش
وقُط يحب خنّاقه
لقيت الدق مش ثابت
وماشي ف سكّتُه زجزاج
لقيتني لضحكتك محتاج
وصوتك لسّه ف وداني
لقيتني بين طاحونة شوق
تروسها القاسيه عصراني
أتاري عذابي ف فُراقك
ما زيُّه يكون عذاب تاني
وخايف أرجع السكّه
ألاقي الصد

واشوف قلبك عليّا احتد
لا طايل نار جمال قُربك
ولا قادر أعيش ف البُعد
أنا دلوقت
بدوق طعم الندم صبّار
واعيش معنى انكساري بجد
ياريتني فضلت ويّاكي
ياريتني ف لحظه ما اتزحزحت

بقلم/ سيد منيرعطيه