في أول صفحة في الكتاب
لاقيتها راسمة
زهرة حلوة . بضحكة باسمة
وردة بنفسج .. بخدود عناب
وعود قرنفل .لابس لي كاب
وقلب أبيض..
منحوت في جذع الشجر
ميهمنيش وجع الشجر
ولاّ في غرامه داب
وثمر الهوى في ليلٌه طاب
لقيتها حالة ..ولّا اشتغالة
ولقيت لهواها ألف باب
قلت أفكر .. اكتب وأعبر
خيالي خدني فوق السحاب
منا أصلي عاشق
............خدود البنفسج
قلت أغزل بخيوط هواها
وحروف هيامي وبكلامي أنسج.
قصيدة غرام ...
يقولوا حلوة والسلام
بس الحقيقة
أنا مش بياع كلام
قربت منها ..دارت خدودها
قربت تاني ..لفِّتلي عودها
وقالت ..سلاااااااااااااام
احترت منها واشتقت ليها
دي زهرة ولَّا ....؟
بس أنا دبت فيها
أريجها ساحر
طالع بصهد الشوق
ما بين النحر والساحر(السحر)
قالوا عني زمان ....
ملك الكلام .وفي الغرام ساحر
نسيوا إني عاشق ولهان...
وبكلام القلب شاعر.
وشعري دا فن
مكتوب بنزف الروح
وقلبي في البستان مستني
يمكن هواها يحن
مستني عبير الشوق
يقبرني في قلبها
ولاّ يحدفني في سماها فوق
غاب النهار
وأنا في المكان وحدي
حلفت لأخطف قلبها
ولّا أحفر في الغرام لحدي
نده قلبها
من ورا ستارة خجل
وقالت يا خالد :
روَّح على عجل
وسيب قلبي ينزف هواك
ويعطر البستان
واقفل وراك الباب
الشاعر خالد العطار