سماكى فين ؟
خالية النجوم ؟
ولا السحابة السودا أكلت ضيها؟
لون السما ..مخنوق......... غريب
لسة القمر
بيبات فى حضن البحر
عاشق ملحته ؟
والشمس دبلانة بلون الإصفرار ؟
وبتنتحر فى الهم ناسية أصلها ؟
زى النحاس جنزر
ومايل للخضار
ألوان حياتك
تايهة فى حدود الخريطة
لساكى ماسكة ف ريشة
من ديل الغراب
فاكراه طاووس
ولا انت راسمة الدور
وعاملة انك عبيطة
تتزفـّى وبكيفـِك
جواز باطل حرام
والرقاصات ماسكين صاجات
عاملين فى ليلة حـِزننا
ميت هيصة
على ميت
زمبليطة
شربات ومنقوع من دمانا
فى الكاسات
لو كان يبات الفرح
فى قلوب النايات
كانت الأغانى الحزنانين
رقـَصـِت
على جتة الحلم اللى مات
كانت الصبايا اتكـَفـِّنت
بدموع حريقة قلبها
على حلم
كان ساكن عنيها
بغدر مات
ويفيد بإيه بس السكات ؟
خليكى فى الفرح المـُزيـَّف
وافرحى
خليكى رامية الحلم
والنـَفـَس الأخير
فى احضان ضلام
فى احضان سـُكات
...............
بـــقـــلـــــــــم ا لـــشــــــا عــــــــــــر
أ بـــــو عـــمــــــا ر ا لـــمـــصــــــــــــــــر ى