هجيرك برد ف ضلوعى
وصوت صمتك محيرنى
وبافرد للقا شراعى
علشان القاك قريب منى
ولما تترسم صوره
مابين عينى وبين ننّى
بتفصل بينا محض ظروف
وتفصلنا مراكب خوف
وحسبه رافضه تتقسم
بتتجمع وتتفرق
وتيجى لحدنا تغرق
وكل ما تيجى تجمعنا
تقرب نتحسب معنى
بتلقى القسمه بتعاند
وتبعدنا
نزود روحنا من روحنا
ونتقوى
ونسلّف من الأحلام
شوية وهم كنا زمان
بنفهم منه إن احنا
ما دام ف الحلم متحدين
مافيش ولا حاجه تبعدنا
أتارى الحسبه محسوبه
تجمع اّه تودع اّه
لكن ف القسمه تقسمنا
==============
شعر عامى ( كاميـــــليا)