<!--

<!--<!--<!--

لسّاك متمسّك بالأوهام

متشعلق ف حبالها الدايبه ؟

لسّاك ع الورقه بتجري حروف

حكايات خايبه ؟

طب مين بتشدّه الحكايات دي

علشان يقراك ؟

دا مافيش ف الأرض يا صاحبي ملاك

وما فيش قدّيس

وانت المعجون بالمثاليه

إزاي ح تعيش ف طريق إبليس ؟!

رح تلقى جدار من بعد جدار

عاملين متاريس

وح تبقى اللعبه اللي ف إيدهم

أو تصبح كاس

يسكروا من دمّك ليل ونهار

ومدام متمسّك بالأوهام

حتما ح تكون ضد التيّار

ومصيرك ح تموت ف التوهه

أو تبقى ف وسط البحر غريق

ح تعافر ويّا ضلام الليل

ما تلاقي طريق

م انت من الأول مش يونس

وما فيش الحوت اللي يشيلك

ولا أي سفينه تكون فايته

ولا شط يبان قُدّام عينك

تتشعلق بالقشه ف تغرق

تتشعلق بالحلم يزُقك

وح تفضل وسط جبال الموج

موجه توديك ...

موجه تجيبك

ولا تنفع دعواتك أبدا

ولا يشفع دمعك وأنينك

علشان م الأول روحت طريق

مليان شياطين

حاوطتك النار من كل مكان

وانت المخلوق من ميّه وطين

ف طبيعي تموت ..

أو تتحوّل تمثال فخّار

وما فيش تمثال فخّار بيدوم

دا مؤكد

يبقى نهايته الكسر

بقلم/ سيد منيرعطيه