<!--
<!--<!--<!--
لمّا تلقى الدمع يرسم
ع الخدود خطين مواجع
وامّا تلقى الحزن داخل
يكسر القلب المدافع
والهزيمه صوتها عالي
وانت وحدك بس سامع
إعرف انك جيت يا صاحبي
م العصور الوسطى وحدك
وان قلبك .. قلب فارس
فوق حصان مالهوش وجود
إنت جيت من موت لموت
موتك الأول كرامه
جوّه قلب المعركه
والعدو طعنك ف ضهرك
موتك التاني مذلّه
لمّا باسم الحُب سيبته
يرشق الطعنات ف قلبك
ياللي نايم جنب ضلك
قوم وعافر
واللي شوفت غرامه كافر
رد له الطعنه الغبيه
كل طعنه قُصادها ميّه
إوعى لحظه تخاف عليه
دمّك اللي مابين إيديه
رح يلومك لو تسامح
صورتك الواضحه الملامح
بكره تبهت
لمّا تلقى عيون كتيره
جت تبُص عليك وتشمت
قوم وإثبت
مد إيدك جوّه منّك
م الوجع إصنع دروع
م الخيال إرسم حصان
إوعى لحظه تبات ف جوع
أو تبان إنسان جبان
مد إيدك جوّه منّك
إنزع الجزء الحنيّن
قوم بسرعه يا صحبي بيّن
للجميع إنك حقيقه
وسط عالم ... إفتراضي
سيد منير عطيه
