لمّا اكون محتاجه حُبك
خدني ليك

لمّا اكون محتاجه حُضنك
خدني ليك

لما تلقى القلب دقُّه بيناديك
خدني ليك

كل شئ ف الماضي ذكرى
سيبني أرسم شمس بُكره

أبقى فكره ف حضن فكره
سيبني أسرح بين عينيك

أزرع الأحلام شراقي
واحضن العمر اللي باقي

ياللي حُبك هو دائي
والدوا ف نظرة عينيك

خدني ليك
إوعى لحظه تغيبها عنّي

دا ف غيابك ..
كل حُزن الكون يزورني

والجليد بيصُب بردُه
جوّه منّي

مد إيد الشوق وخدني
تلقى قلبي بكل نبضه

راح عشان يتدفّى فيك
وامّا اتوه ف السكّه نادي

خلّي صوتك ورد نادي
عطره يملاني وفؤادي

يهتدي م العطر ليك
وان لقيتني تايهه منّي

أو لقيت الهم صابني
إرمي نفسك جوّه حضني

هلتقيني تاني بيك
مهما بان ف عيوني قسوّه

واللا كان جوايا نوّه
بين دراعك هبقى حوّا

دايبه من لمسة إيديك
إوعى شئ يا ضي عيني

يبقى يوم بينك وبيني
خطوه منك هتلاقيني

بعت كُلّه وبشتريك
خدني ليك

بقلم/ سيد منيرعطيه