بكرا أمل ( ان شاء الله )
زفرات / عبدالعظيم الأحول
صباح السبت ٥ / ٩ / ٢٠١٥
مات الكلام
هوا مكانشى لسة مات ؟
بإدينا موتنا الكلام
وبإيدنا حيرنا السكات
مات الكلام
يوم ما ابتدينا نشترى
حزن وآهات
مات الكلام
يوم ما ابتدينا نخبى على بعض الدموع
يوم ما افترقنا زمان
واتبعترت منا الخطاوى فى الرجوع
مات الكلام
يوم ما قتلنا الروح
وفضلنا الخضوع
مات الكلام
هوا انتى فاكرة انه مات ؟
ها ها ههااااااا
تبقى لسة بتحلمى
عمر الكلام
ما يموت فى قلب
اتربى على دق الحنين
عمر الكلام
ما يموت فى قلب
استكفى من غدر السنين
قلب اشترى حتى اللى باعه
قلب انشوى على نار صراعه
قلب اتحبس
فى الأمنيات وف عشقها
بدل بقلبه قلبها
عمر الكلام ما يموت
مهما السنين هتفوت
بس اللى نقدر نعمله
منسيبش روحنا للدمار
ونحن له
نقدر قوى نتحمله
أصل احنا أقوى م الدمار
وبعشقنا
حلف المرار
لكن أكيد
لسة فى صفحة بكرا جاى
عشق وغرام
ننسى الخصام
لكن مننساش الأمل
والفرح لسة محتمل
الله معين
ويجينا يوم
نبقى تمام
نفرح
وينسى قلوبنا كابوس الآلام
ونعيش بقى من نفسنا
أيام جميلة
والسلام
مات الكلام
@@@@@@@@@@@@
ردا على قصيدة الشاعرة القديرة الأستاذة ميمى عبدالجليل (مات الكلام)
