ياللي من غير قلب

تعالى اتفرج و اشترى قلب
هنا سوق القلوب
..........................
قلب خداع
قلب بياع
و قلب من همسة
يعشق و يدوب
قلب مليان غيرة
قلب مشاكلة كتيرة
و قلب صافي 
ف حبه وافي
للمحبوب
هنا سوق القلوب
...............................
قلب يعشق كل يوم
قلب حزين مهموم
قلب ناسي
قلب قاسي
و قلب ف صبره ايوب
هنا سوق القلوب
.......................................
قلب يجرح قلب حبه
و قلب مجروح م اللى حبه
قلب زى الشمس يشرق
و قلب يعشق الغروب
هنا سوق القلوب
..............................
اشتريلك قلب
يعيش معاك طول الزمن
قلب يكره او يحب
انت اللى هتدفع التمن
و كل شيء محسوب

هنا سوق القلوب