قصيدة بعنوان : انا انسان
بقلم / حاتم سليمان
أنا انسان
حالف امشي واكمل
ومين فينا بيتكمل
ومهما كنت بتجمل
لا بد فيا من النقصان
انا انسان
ده هو الكمال لله وحده
ولو ابتلاني من عنده
لا هتزمر ولا اعانده
راح املا القلب بالايمان
انا انسان
انا مستقوي بااراده
منحه من ربي وزياده
ليه ارفضها واتمادى
واقبل عطف بيه بتهان
انا انسان
لا انا بائس ولا عاجز
ولو صدوني بحواجز
هعديها واكون فايز
برضى المولى الرحمن
انا انسان
متبصليش على اني متعايب
ولا تهنيش بضميرك الغايب
ده هو تفكيرك الخايب
العيب عيبك ياغلبان
انا انسان
راضي بكل ما فيا
واللي راح ومش فيا
راح ارسم بسمه في عنيا
وارسم بكره كالبستان
انا انسان
