(الغربه)
الغربه غربة وطن
وغربة الاحباب
والكربه هيا التمن
ووداع وبعده غياب
آخرتها ايه يا زمن
من بعد غربتنا
سبنا الديار والوطن
وتمنها دمعتنا
فارقنا ناس احباب
هانت محبتنا
والفربه مابترحمش
ملعونه أم الفلوس
مع ناس ماتتقدرش
بس المهم النفوس
بالأصل ماتغيرش
والغربه شيئ محسوس
وتمنها مايقصرش
غير في اللي باع نفسه
لأجل الفلوس. والجاه
والغربه يا ولداه
صعبه ولو جنه
حتي القريب تلقاه
يصبر ويستني
ع الغربه ومرارها
يكتم في اسرارها
ولا عمره يوم يشكي
ولوحدته يبكي
جوه حشاه اوجاع
حاسس بانه إتباع
بالغربه لاجل المال
من كتر احزانه
غني البكي موال
علي وتر دمعه
يبكي ومين سامعه
غير نفسه مع حاله
قام داري مواله
حالم باماله
وكأنها تربه
ينعي ساعات حاله
يلعن ابو الغربه
اللي تمنها فراق
وحلوها حراق
سيبنا الديار والاهل
كان الوداع مش سهل
بس الفراق اصعب
والحزن كان مكتوم
قلب الفرح لهموم
نصحي في عز النوم
من حلم مش معلوم
لا هو فرح ولا كربه
ملعون أبو الغربه
(عبده النجار)
