<!--<!--<!--<!--<!--
6خطوات لعلاج تشتت الإنتباه والنسيان عند الراشدين:
أنا مهندس عمرى 28 سنة...متزوج وعندى ولد...
بأنسى كثير وعندى مشكلة فى التركيز ومسببة لى مشكلة فى شغلى وكمان مع زوجتى.. وأنا بدأت أحس بالمشكلة دى لما دخلت الكلية وأثرت على وتسببت إنى رسبت فى بعض المواد أثناء الدراسة لأنى كنت بأحس بتشتت فظيع..وقلق ومأعرفش أبدأ بإيه وأعمل جداول كثير وأقول أبدأ من بكرة وهكذا بكرة يبقى اللى بعده وأبقى مش عارف لا أبدأ ولا أكمل..وما صدقت إن خلصت دراسة بس واضح إن المشكلة برضه موجودة أو مستمرة أنا قرأت عن موضوع تشتت الانتباه فى الكبار اللى حضرتك كتبتى عنه فى الجروب....لكن هل ممكن فعلاً تكون دى مشكلتى بالرغم من إن ما حدش قال حاجة زى كده عنى وأنا صغير؟بس أنا حكوا لى كثير إنى كنت شقى قوى وفاكر إنى تعرضت لحوادث كثير وقعت ورجلى انكسرت ومرة نطيت من على الديسك فى المدرسة وذقنى اتفتحت ونزفت من أنفى بس كنت شاطر وأنا صغير ومن الأوائل علطول فهل ممكن مشكلة الانتباه ده تبدأ فى سن متأخر وإيه هو العلاج أو المفروض إنى أعمل إيه؟
هو إضطراب فرط الحركة وتشتت الإنتباه بيحصل فى الكبار؟
الرد على الاستشارة:
سيدى الفاضل:السلام عليكم ورحمة الله وبركاته:
بداية ماذا تعنى الحياة الطبيعية فى مرحلة النضج النفسى...حياة تتسم بالتوازن بين أوجه الحياة المختلفة فى الجانب المهنى والإجتماعى..يعنى العمل والزواج والأولاد وكمان الأهل من الأب والأم خاصة لو كانوا كبار فى السن وبحاجة للأبناء نظراً لضعفهم وإحتمال إصابتهم بأمراض الشيخوخة والأصدقاء والترفيه...الخ......يعنى مسئوليات كثير..طيب نعمل إيه ونسيب إيه....لازم كله يتعمل...طيب نعمل إيه قبل إيه؟مش عارف....دايماً متأخر..دايماً بأجل كل حاجة وما أعملش حاجة وحاسس إن مخى ملخبط وساعات كثير أنسى حاجات مهمة ولازم تتعمل بس حاسس إنى مشتت ودماغى مش ملاحقة على كل ده...علشان كده بقيت دايماً عصبى..دايماً بأتنرفز ومزاجى متقلب..والقولون تاعبنى جداً...أه شكلك كده فعلاً ممكن يكون عندك مشكلة تشتت الإنتباه...وهى مشكلة فى الأساس لها أصل عضوى مرتبط بمجوعة من الوظائف المخية المسئولة عن فن إدارة الحياة ككل....إمتى وإزاى تبدأ أى مهمة وإزاى ترتب المهمات المتعددة وإزاى تنجزها وإزاى تركز فى المهم وتهمل مالايهم فتمنع التشتت وأزاى تتحكم فى إنفعالاتك وتمسك غضبك....تقول لى بس أنا وأنا صغير ماحدش قال إن كان عندى المشكلة دى ..أقولك فعلاً ممكن يكون ده حقيقى لأن زمان كانوا بيقولوا عليها سواء فى البيت أو المدرسة إنك شقى وطفل مشاغب ومش بتسمع الكلام وكمان لما تسرح مع نفسك يتقال عليك إنك تعانى من فرط أحلام اليقظة...ماهى أحلام اليقظة المفرطة برضه أحد أعراض هذا الإضطراب (فرط الحركة وتشتت الانتباه )لكن للأسف فى ناس كثير ماتعرفش ده...ما علينا..بتقول بس أنا كنت بأركز وكنت متفوق فى المدرسة ومن الأوائل والمشكلة ظهرت لما كبرت...حأقولك فى بعض الأحيان لما يكون الإضطراب ده متوسط الشدة نقدر نقول إن طاقة الوظائف التنفيذية للمخ بتكون كافية على قد متطلبات المراحل الأولى من العمر يعنى فى المرحلة الإبتدائية والإعدادية..ويمكن كمان لغاية المرحلة الثانوية...لكن بعد شوية طاقة المخ دى ممكن لاتكفى لمواجهة كل المتطلبات الخارجية لصعوبة الدراسة وتعدد الإهتمامات . أما الحالات اللى كانت معروفة وتم تشخيصها من الطفولة فيتبقى لديهم أعراض تشتت الإنتباه والنسيان وعدم القدرة على البدء فى وإنجا ز المهام نظراً للبطء والتأجيل المستمروكذلك عدم ضبط الإنفعالات..طيب وبعدين يعنى الموضوع ده له علاج واللا أنا حأفضل كده واللا إيه الموضوع؟..لأ طبعاً الموضوع له علاج والعلاج علاج دوائى ممكن يساعد لكن الأهم والأساس هو تدريب المخ...التدريب الذى يساعدك على تحويل نقاط الضعف إلى قوة..التدريب الذى يساعد على إنجاز المهمام والتخطيط الجيد لعمل الأولويات ويزيد من القدرة على الإنجاز...التدريب ممكن ذاتى وتعمله من نفسك ولكن إذا لم تتمكن من ذلك فقد يحتاج ذلك لعدة جلسات مع المعالج النفسى لبدء تدريب الوظائف التنفيذية للمخ...والأن:
6 خطوات لعلاج تشتت الإنتباه والنسيان عند الراشدين:
1-تعايش مع مشكلتك...اعترف بوجودها..تجنب الإحباط أو إجعله طاقة إيجابية تساعدك على التغيير...كن مقتنعاً أنك تستطيع أن تتغير...لاتوهم نفسك بأنك كنت أفضل فى السابق...كانت طاقتك محدودة ولم تفى بإحتياجاتك فأنت بحاجة لتتغير للافضل لا لأن تعود لما كنت عليه....أى لا تحزن على نفسك بحجة أنك تشعر بالتدهور الذهنى....
2- ممارسة الرياضة وتناول الطعام المتوازن مع المزيد من الخضروات الطازجة والفاكهة والتقليل من السكريات والنشويات لضبط الحالة المزاجية...والسيطرة على الإنفعالات.
3-النوم والراحة من 7-8 ساعات يومياً..هام جداً لمعالجة المعلومات وتركيز الإنتباه ودمج المعلومات وحفظها فى الذاكرة طويلة المدى.
4-تعلم مهارة إدارة الوقت..إجعل هناك تواريخ محددة للبدء فى المهام وكذلك لإتمامها...مهما بدت المهمة بسيطة وسهلة..لاتنسى أن تعطى لنفسك أوقاتاً للراحة...إحذر عادة التأجيل..قرر أن تبدأ فوراً..إجعل الأولوية للمهام التى ترتبط بوقت محدد لإنجازها..يعنى لو مطلوب منك إنهاء شئ معين فى عملك خلال يومين وحاجات تانية غير مرتبطة بوقت...إجعل الأولوية للمطلوب بعد يومين..ستشعر بعده بالراحة والهدوء...وإلا فإن التوتر الناتج عن إرتباط المهمة بالوقت سيصعب البدء فيها مالم تبدأ مبكراً.
5-لاتنسى العلاقات الإجتماعية فهى جزء أساسى فى الحياة ...إجعل هناك جدول للعلاقات الإجتماعية متى تلتقى الأهل والأصدقاء...متى تتحدث فى التليفون...متى تقرر غلق التليفون لأنك قررت التركيز فى مهمة ما لإنجازها...تعلم مهارات التواصل الإجتماعى فقد يكون لديك من الإندفاعية ما يجعلك غير قادر على الإنصات للأخرين لفترة طويلة...تعلم مهارة الإنصات لأنها تحافظ على العلاقة بالأخرين...حافظ على التواصل البصرى...لاتكن مندفعاً وتريد أن تتحدث أنت طوال الوقت.
6-إجعل بيئة العمل داعمة لمشكلتك....مثلاً...الجداول...قوائم لترتيب أولويات العمل-الأقلام الفوسفوية لتمييز الأهم فالمهم...نوتة صغيرة لتذكرك بأهم المواعيد أو استخدم المنبه فى تليفونك ليذكرك بالمواعيد....وتذكر أن أحسن فرص للعمل لتناسبك هى مؤسسة لها برنامج عمل واضح منظم مع تحديد المهام للأشخاص مع وجود فريق عمل منظم(الأمور تسير بالجدول والمواعيد والمهام محددة).
حاول أن تطبق هذه الخطوات لمدة ثلاثة أشهر..تذكر أن الأمر ليس سهلاً فأنت تقوم بتدريب المخ لوظائف كان من المفترض أن يتم تدريبها بشكل تلقائى منذ الطفولة...لكن لم يحدث لسبب أو لأخر...فأنت تقوم بتأهيل جزء من المخ وهذا يحتاج لوقت وإصرار ومجهود...لكن ماذا لو لم تشعر بتحسن ملحوظ...إذاً لاتتردد فى طلب المشورة وعمل جلسات علاجية تهدف لعمل هذا التدريب بشكل أكثر حرفية...حيث سيتم وضع بعض الإضافات خاصة العلاج المعرفى السلوكى -وبعض الإرشادات لشريك الحياة...كذلك قد تحتاج للعلاج الجمعى مع أشخاص لديهم نفس المشكلة.
د.نهلة نور الدين حافظ
أخصائى الطب النفسى
مستشار نفسى وتربوى بالمواقع الإلكترونية
[email protected]
ساحة النقاش