<!--<!--<!--
التواصل الزوجى الناجح....(4)
النواهى فى الحياة الزوجية (متابعة)
تكلمنا فى المرة السابقة عن النواهى فى الحياة الزوجية وشرحنا أنها قائمة من الأشياء التى يجب تجنبها وناقشنا فى الجزء السابق فكرة تجنب طوابع التداول العاطفى والتى تعنى وصم شريك الحياة بصفة معينة...مثل بخيل...عصبى مهمل بحيث يلتصق هذا المفهوم عن شريك الحياة فى الذهن وتكون ردود الأفعال تجاه تصرفاته معتمدة على هذا الوصم المطبوع فى العقل الباطن ومن ثم قد يكون رد الفعل فى بعض الأحيان إنفجارى ومبالغ فيه ولايجد له شريك الحياة تفسيراً...وهنا بإذن الله سنكمل شرح النواهى فى الحياة الزوجية...
-تجنب معالجة الصراعات والخلافات بالصمت..الصمت يحمل فى طياته كبتاً لمشاعر الغضب والتى تتراكم وتؤدى إلى انفجار ونوبة أو نوبات غضب عارمة ومتكررة وغير مبررة.
-تخير الوقت الذى تتكلم فيه عن المشاكل...فمثلاً يجب أن تتجنب التحدث وأنت مشحون بالغضب بحيث لاتملك زمام نفسك وتطلق لها العنان لتستحضر كل سلبيات شريك الحياة (يعنى تجيب له القديم والجديد..تفتح الكتاب الأسود اللى مخزن فيه كل إنطباعاتك عنه....وأه من القلب الأسود فى الحياة الزوجية).
-إحذر الهجوم على شخص شريك الحياة....يعنى زى أنت عصبى أنت أنانى أنت مش بتحس بحد أنت مهملة فى بيتك...أنت وأنت....ده هجوم على شخص وكيان الطرف الأخر والأفضل أننا نحدد نفسنا فى المشكلة مثلاً....
بدل ما نقول أنت عصبى....نقول...ياريت نقدر نتكلم مع بعض بهدوء ونفكر إزاى نقدر نحل مشاكلنا...
بدل ما نقول أنت مهمل....ياريت نحط كل حاجة فى مكانها علشان نلاقيها وقت ما نحتاجها بدل ما نقعد ندور عليها..ده حيوفر لنا وقت كبير..بدل ما أقول أنت مش بتراعى مشاعرى....أقول على فكرة كذا....وأسمى الحاجة اللى بيعملها شريك الحياة...بيضايقنى لو قدرت ما تعملش كده حأكون مبسوطة...وبدل ما نقول أنت مهملة وبيتك مش منظم....ممكن نقول البيت محتاج شوية نظام شوفى إزاى ممكن أساعدك علشان نرتبه...بدل ما نقول أنت مش واخدة بالك من بيتك وأولادك ممكن نقول عايزين نقعد مع بعض شوية علشان نتكلم بخصوص الأولاد. وياريت كل كلامنا تسبقه كلام حلو نعود عليه اللسان زى ياحبيبى وياحبيبتى..لأن لهذه الكلمات سحر خاص فى التأثير على الأخر
-لاتلقى بمشاعرك السلبية كالحجارة فى وجه الطرف الأخر وذلك بتفوهك لكلمات مثل(أنا خلاص زهقت-أنا قرفت- أنا كرهت العيشة دى -أنا مابقتش طايقة أو ما بقتش طايق البيت ده...الخ)
- لو شريك الحياة بدأ الحوار فى مشكلة من المشاكل...حذارى من تغيير مسار الحديث لأن هذا الأمر مستفز للطرف الأخر الذى سيشعر باستهانتك لما يهمه من الأمور أو سيشعر أنك ثابت على موقف معين فى هذه المشكلة ولاتنوى التغيير أو أنك ترى أن الحوار لايجدى مع الطرف الأخر وكل هذه الأمور من شأنها توصيل رسالة لشريك الحياة بلاش نتكلم فى الموضوع ده لأن مافيش فائدة
- إحذر النقد المتكرر لشريك الحياة دون اقتراح الحلول أو تحديدك بشكل مباشر لما تريده منه...مثلاً النقد المتكرر مثل...بشكل يومى توجيه هذه الجملة للزوج...أنت مش بتهتم غير بنفسك وطلباتك...الزوج هنا المفروض بينه وبين نفسه حيقول هو أنا المفروض أعمل إيه...
فالأفضل بدل النقد والكلام الغير مباشر أن تقول الزوجة....عايزاك تساعدنى وتسمعنى فى مشاكل الولاد عندى مشكلة النهاردة مع ابننا ....فى المدرسة وعايزة أخد رأيك إزاى أتصرف...
مثال ثانى..الزوج بيقول لزوجته بشكل شبه يومى أنت مش فاضية لى خالص..يا إما فى شغلك يامع ولادك يابتروحى لأهلك أو تخرجى مع أصحابك...يبقى الزوجة حيكون سؤالها إيه المطلوب منى؟
يبقى الأفضل بدل النقد والكلام الغير مباشر أن يقول الزوج لزوجته...نفسى تسمعينى لما أتكلم عن مشاكلى وأخد رأيك فيها...أنا عندى مشكلة فى الشغل وعايز أفضفض معاك..نفسى تكونى صديقة لى...
- إحذر وأحذرى كلمة أنت عمرك ما عملت...أنت عمرك ما عملت..أنت طول عمرك كده...وأقصد هنا كفران العشير وهو أكثر من المرأة أن تقول لزوجها ما رأيت منك خيراً قط..ولكن بعض الرجال أيضاً يكفرن العشير وينكرون محاسن الزوجة أما عن كفران العشير وكونه أكثر فى المرأة فهذا يرجع لطبيعتها والتقلبات المزاجية التى قد تصيب المرأة أكثر من الرجل وهذا له أسباب فسيولوجية خاصة فيما يتعلق بالدورة الشهرية وهذا ما يجب أن يتفهمه الزوج وبإذن الله سيكون لنا مقالات مفصلة عن العوامل الفسيولوجية والتقلبات المزاجية فى المرأة.
- إحذر وأحذرى الشتائم والتنابز بالألقاب...هذه الأفعال لاتنسى أبد الدهر.
- تجنب الطرف الثالث فى حل المشكلات الزوجية.....لابد من المحافظة على خصوصية الحياة الزوجية.
وللحديث بقية بإذن الله.
ساحة النقاش