<!--<!--<!--<!--
الخلاص
رسمت فوق جسمي الذي
علامة إستفهام
حلقولي راسي صريخ
حتى عظام الجمجمة
بانت جميع الأوردة في مخي النحاس
ما زلت مربوط في الخلاص
العالم المدهون رصاص
شربت عيونه قسوتي
والجوع في إثيوبيا بياكل جتتى
أنا كبش أفريقيا الرضيع
برضع حطب
شبكت عيني في نحرها بعد الغروب
لوني الصريح عمال .. يدوب.. ويدوب.. يدوب
لكن ما زال ماسك ف عينها وف العظام
إحساسي من أقصى الجنوب حتى الجنوب
مليان رخام
الشمس طالعة ف معدتي خط إستوا
عايش ما بين ثقب الأوزون
والأبخرة المتصاعدة من جلدكم
عمق الرئة
من بين سنانكم شفت أمعائكم
وباغرق فيكوا للأثنى عشر
الإيدز فينا بينتشر
وهربت للجوع والجفاف
غنولي مرة للرجوع
ومرة تانية عشان أخاف
وأنا اللي خوفتوني بيه هو أنا
فتحقونني دم خيل ولتسحبوني لمصلكم
لن ترعبوني بالصراخ
أنا منتهى صوت الألم ف الحنجرة
لن ترعبوني باللهب
مزروع ف قلبي جهنمة
أنا كبش أفريقيا الرضيع
والجوع ف إثيوبيا بياكل جتتي
حلقولي راسي بخنجرك
حتى عظام الجمجمة
وما زلت مربوط في الخلاص
أنا منتهى هذا المدار
وما زلت باحلم بالخلاص
"بس خلاص"
" كتبت عام 1986"
